Струмица и струмичани имаа можност да уживаат во неповторлива музичко сценска плетенка од класична музика и балет, староградски мелос, традиционални македонски песни и ора, балетски перформанс адаптиран на македонски ритам и грандиозното финале со изведба на „Тешкото“ од Смокварски низ изведбата на Камерниот оркестар под диригентска палка на Фи Фи Ле, проследено со танцова кореографија.
„Концерт на добрината“ беше насловена музичката убавина која ја организираше Фондацијата „Елеуса“ од Струмица во Центарот за култура „Антон Панов“, а настапија Вокално-инструменталниот состав „Стихири“ и учениците од ДМБУЦ „Илија Николовски Луј“ од Скопје.
Од Фондација „Елеуса“ велат дека заедницата само така може да помогне за оние на кои најмногу им треба помош.
„Нашата фондација во неколку години од своето постоење ја покажа и докажа посвтеноста во мисијата – да им се помогне на луѓето кои што страдаат. И Вашето присуство вечерва е доказ за несебичната љубов што ја имате кон нашите собраќа кои се во неволја. Голема благодарнсот до Општина Струмица и градоначалникот Костадин Костадинов кој секогаш ни ја дава целата поддршка во реализиација на нашита активности. Благодарност и на ДМБУЦ „Илија Николвски Луј“ и директорката м-р Даница Стојанова за нивното гостување“, кажа Наташа Василевска Трајчевска од Фондација „Елеуса“.
„Ваква една симбиоза од неколку уметнички музички гранки не е секојдневие и мислам дека ова беше одлично и за публиката и за самите изведувачи. Досега имаме организирано многу концерти, сцената е таа каде што нашите ученици растат, сцената е нашиот дом, а музиката знаете дека освен што е фасцинантна за секој човек и секое уво, е и лек за душата. Да продолжиме како хуманисти зошто музиката и уметноста е дадена од Универзумот и таму нема трошење, таму енергијата стои и е бесконечна и затоа да бидеме што повеќе хумани и што повеќе да ги поддржуваме нашите деца“, кажа Даница Стојанова, директорка на ДМБУЦ „Илија Николовски Луј“ од Скопје.
Градоначалникот Костадин Костадинов истакна дека добрината е благослов за оној кој ја прима, но добрината е благослов и за оној кој ја дава.
„Вечерва овој храм на културата се престори во храм на добрината по заслуга на организаторите од фондацијата „Елеуса“ на чело со Викарниот епископ Стобиски – господин Јаков, но и на оние кои настапија на сценава. Овој денешен „Концерт на добрината“ го доживеав како извор на вдахновение и чувство на исполнетост со несекојдневни емоции“, кажа Костадинов.
Средствата собрани од „Концертот на добрината“ ќе бидат наменети за некои од хуманитарните кампањи кои го спроведува Фондација „Елеуса“.
ФОТО: Тивериопол.мк
