Во недела, 15 декември во Центарот за култура „Антон Панов“ во Струмица, со почеток во 19:00 часот свој концерт ќе одржат членовите на популарниот музички состав „Чалгија саунд систем“.
Бендот „Чалгија саунд систем“ е создаден во 2008 година со една почетна зацртана цел: да истражува низ оставнината на македонската музика, да ги открие нејзините скриени тајни и звуци и да се вложи одржувајќи ја во добра форма македонската чалгија без да се изневери традицијата.
Бендот го имаше своето албумско деби во 2010 година со истоимен албум во кој беа без никакво двоумење отсвирени и отпеaни некои од најубавите македонски чалгиски песни. Созревајќи, во 2019 година бендот го издаде својот втор албум именувајќи го „Тихувај“ како провокација за авторски поглед на нова чалгија во која беа вметнати современи звуци. Летото 2023 година „Чалгија саунд систем“ направи омаж на еден од последните охридски трубадури – Климе Садило, изведувајќи ги неговите незаборавни виолински делници без никакви додавки или преаранжирања положувајќи го тестот на строгата охридска публика.
„Чалгија саунд систем“ го сочинуваат: Добрила Грашеска – вокал, Александра Кузман – виолина, Дориан Јовановиќ – ут, Бошко Мангаровски – канон, Филип Крстевски – перкусии.
Недела, 15 декември | 19:00 часот | Центар за култура – Струмица
