Комуналното претпријатие во Струмица го подновува возниот парк со механизација која не е штетна за животната средина

Денеска во возниот парк на Јавното претпријатие за комунални дејности „Комуналец“ – Струмица беше претставена новонабавена електрична машина за собирање смет и чистење на јавните површини. Пред членови на Советот на општина Струмица, раководството и вработените на јавното претпријатие беа демонстрирани способностите на оваа машина. Од струмички Комуналец потенцираат дека станува збор за механизација која не е штетна за животната средина.

„Оваа нова електрична машина, која пред сѐ е еколошка бидејки при работата не испушта никаква прашина ниту други штетни гасови, ќе биде искористена за секојдневно детално чистење на градскиот плоштад со што ќе се зголеми ефикасноста и брзината на работата, а со тоа и самиот плоштад ќе добие поурбан изглед“, велат од ЈПКД „Комуналец“ – Струмица.

Новонабавената машина GM400ze RS е производ на Грин Машинс од Велес. Во возниот парк на струмички Комуналец има и други возила од овој произведувач.

Инаку, локалната самоуправа во Струмица работи на повеќе проекти кои имаат за цел зачувување на животната средина, од кои еден од поголемите се однесува на целосно електричен и еколошки јавен превоз во општината.