„Комуналец“ почнува со пролетната акција за чистење на дивите депонии и зелените површини

Со подобрување на временските услови и покачување на температурите ЈПКД „Комуналец“ Струмица започнува со чистење на дивите депонии околу градот како и со чистење на сите јавни зелени површини во градот, малите паркови и игралишта за деца кои се наоѓаат помеѓу станбените објекти.

„Иако поединци се однесуваат несовесно со фрлање на смет насекаде се зголемува бројот на граѓани кои се повеќе се заинтересирани за околината која ги опкружува, сакаат и заслужуваат почисти дворови, улици, паркови и детски игралишта, и покрај секојдневната работа и апели од страна на ЈПКД „Комуналец“, Општина Струмица и еколошките друштва, несовесноста на некои поединци победува, остава грда слика на нашето секојдневно опкружување. Со зголемување на апелите, со секојдневното наше работење, совесно однесување на сите поединци се надеваме дека ќе го подобриме и унапредиме изгледот на нашиот град за да добиеме почисти улици и јавни површини, детски игралишта и паркови. Со нашето однесување да дадеме пример и да покажеме дека можеме да имаме уредена, чиста и здрава животна средина“, стои во соопштението на струмичкото комунално претпријатие.