Кире Пиличев и Георги Кончалиев создадоа краток филм „Кажи ДА на природата“

Синоќа во организација на Здружението за документирање на природните наследства „Wild Artisans“ од Струмица беше промовиран краток документарен филм насловен „Кажи ДА на природата“, финсиски поддржан од Општина Струмица.

Кире Пиличев и Георги Кончалиев го создадоа овој филм, во кој како актери се појавуваат деца, љубители на природата, креативци, млади уметници кои со овој видео запис сакаат да ја пренесат еко свеста за онаа што имаме во природата, дар од Бога, а во што живееме, создадено од нас луѓето.

„Лично познавајќи ги двајцата креативци, ентузијасти, вљубеници не само во природата, туку и во уметноста воопшто, лично чекав да го видам финалниот резултат од реализацијата на проектот и сите тие нишки кои само вешто око може да ги види и да ги протне низ фото објективот и камерата на монтажната лента и да ни ја покаже во сета раскошност убавината на нашата природа. Но и да ни предочи сето тоа што го имаме, но сме во ризик да го изгубиме доколку се остварат низа еколошки закани кои демнат низ струмичкиот регион“ – кажа Катерина Давчева, промовирајќи го видеото „Кажи ДА на природата“.

Пиличев и Кончалиев не го стесниле просторот за својата работа само на камерата и фотоапаратот, туку им дозволиле на децата да ја изразат својата лична импресија за природата и на хартија преку бои, а кои цртежи беа изложени во Младинскиот центар во Струмица, каде и се одржа промоцијата на филмот.

ФОТОГАЛЕРИЈА