Она што со голо око се гледа како една ѕвезда, всушност се две ѕвезди… „Сириус“ е најсјајната ѕвезда на ноќното небо, а токму во еден хотел со вакво име во Струмица синоќа сјаеше од кристали, рефлектори во разни бои и луѓе под маска.
Го гледаш Јосип Броз Тито, а всушност гледаш уште една личност, Костадин Костадинов, градоначалникот на Струмица. Ја гледаш Јованка Броз, а таа да ти била неговата нова девојка Гордана Георгиева. Гледаш живи мртовци, а они биле принцот и принцезата за карневалот, Наско и Катерина. Сите беа по две личности… И Хитлер беше, оригинал, чиниш направен во восочна фигура, ама се движеше, играше… Фидел Кастро, Че Гевара, Гадафи, Мајка Тереза, Папата… Тие му беа другари на Тито. Имаше и црнци и Арапи, Алиса од земјата на чудата беше, Егзотични птици, Дизниеви принцези, имаше и една група што го имитираа од филмот тој глумецот што се растеглува со жолт костум… Минатото, сегашноста и иднината на еден бал, но на Маскенбал струмички.
Прекрасно нешто, се замислуваш во некој друг свет, не во оној нашиот нормалниот, секојдневниот, во некој поубав свет од ова што е денешница. Ама и ова вечер не можеа да го сокријат онаа што им е во душата. Замислете Грци играат оро на македонска песна, ама и нашите играа на сиртаки. Урнебесно до раните утрински часови. „Ретроманија“ правеа расположение до сабајле. Атракција на Маскебалот беа Грците од Кукуш. Со тапани се расчукаа од влезот на салата до пред бината.
На Маскенбалот освен нашите, имаше и Хрвати, Срби, Босанци, Црногорци, Грци, Бугари, а тука беа и гостите од FECC, од Шведска, Германија, Холандија, Италија, Словенија и Турција, и тие играа цела вечер на се што ќе се свиреше.
На главната карневалска вечер, која стартува денеска од 18:30 часот, ќе учествуваат 41 група со околу 1200 учесници под маски, од кои околу 300 се гости од странство.
