Денеска Делегацијата на Европската Унија преку мрежата на „Јуроп хаус“ низ седум градови во Македонија ја организираше хуманитарна иницијатива „Сите за Кочани – Трчаме заедно“. Меѓу нив беше и Струмица каде 150 граѓани од струмичкиот регион се вклучија во трката низ струмичките улици.
Во машка категорија, првото место го освоија Столе Ангеловски, Михаил Ников и Горан Стојанов, кои финишираа заедно во солидарност, со време од 19 минути и 30 секунди – вистинска слика на духот на оваа трка. Во женска категорија, првото место го освои Даниела Велинска со време од 22 минути и 55 секунди, второто место ѝ припадна на Марија Гинов (23’50”), додека третото место го освои 10-годишната Викторија Стоева со време од 24 минути и 30 секунди.
Целта на настанот беше преку трчање и симболични котизации да се обезбеди поддршка за настраданите од трагичниот настан во Кочани, средства кои понатаму ќе се распределени преку Црвениот крст.
Во трката учествуваше и заменик амбасадорката на Романија во Македонија, Јоана-Вероника Чиолка, додека со своето присуство и поддршка на настанот учествуваше и амбасадорката на Грција, Софија Филипиду.
Организаторите од „Јуроп хаус“ Струмица им се заблагодарија на сите граѓани, спортисти, рекреативци, на Црвениот крст, Општина Струмица, СВР Струмица, ЈЗУ „Здравствен дом“ Струмица, ЈПКД „Комуналец“ Струмица, ТППЕ Струмица и СОУУД „Димитар Влахов“, кои несебично се приклучија на оваа трка и со своето присуство испратија силна порака на солидарност.
ФОТО: Јуроп хаус Струмица >>>
