Инклузивно детско игралиште за Дневниот центар за едукација и рехабилитација „ЕдуПрактика“ преку проект на Здружението Демократски институт за општествени и политички анализи

Денеска со коктел дружење беше означено завршувањето на проектот „СО ДЕТСКА ИГРА ДО ИНКЛУЗИВНО ОПШТЕСТВО“, реализиран од Здружението Демократски институт за општествени и политички анализи – Струмица.

Со овој проект Дневниот центар за едукација и рехабилитација „ЕдуПрактика“ од Струмица доби надворешно инклузивно детско игралиште и повеќе сензорни и терапевтски играчки со вредност од околу 13.000 евра. Овој проект е целосно финансиран од Бугарска помош за развој како програма на МНР на Бугарија. Проектот е реализиран во координација со „ЕдуПрактика“ и со одобрение од градоначалникот на општина Струмица, Костадин Костадинов кој одобри поставување на игралиштето, за што застапникот на Здружението, Александар Илиев, искажа благодарност.

На коктелот присуствуваа десетици родители, специјални едукатори и рехабилитатори, учители, пратеникот Миле Цеков и припадници на невладиниот сектор. Коктелот помина во опуштена атмосфера, а Илиев посочи дека основна цел на овој настан е на родителите и децата од центарот да им се покаже дека во Струмица има граѓани кои се со нив и сакаат да помогнат. Исто така Илиев ги охрабри родителите да посочат кои се нивни потреби во кои може да помогне невладиниот сектор.

Интересно е што овој проект започна после панел дискусија во 2023 година меѓу невладиниот сектор, родители на деца со попречености и претставници од амбасадите на Република Австрија и Република Бугарија. Веднаш после тоа во 2023 година Здружението бараше донатор и комуницираше со повеќе амбасади.

Важно е да се напомене дека во општина Струмица пред две години немаше Центар за дневен престој на деца со попреченост, а денес има центар со солидна опременост и персонал. Илиев за Радио СтрумицаНет изјави дека се надева на работна средба со градоначалникот на Струмица и со донаторот да покаже за бенефитите на овој проект и да посочи како нашите сограѓани кои имаат потреба од Центарот „ЕдуПрактика“ да добијат подобра поддршка.

ФОТОГАЛЕРИЈА