Изградбата на Социјалната населба во Струмица влегува во трета фаза – ќе се подигнат првите 26 од планираните 118 куќи

Градоначалникот на општина Струмица, Костадин Костадинов заедно со претседателот на Советот, Марјан Даскаловски, советници и соработници, во присуство и на претседателот на Социјалдемократскиот сојуз на Македонија, Венко Филипче ја посетија Социјалната населба во изградба, која се наоѓа над градот Струмица. Станува збор за населба на која треба да се подигнат 118 куќи, и да се сместат жителите од дивата населба на улицата „Климент Охридски“ во Струмица каде граѓаните живеат во дивоградби и на небезбедна локација покрај „транзитниот пат“.

„Како Општина првата фаза ја реализиравме со износ од 100 милиони денари и е целосно завршена, ставени се потпорни ѕидови, изградена е улицата, поставено е улично осветлување и канализација. Во втората фаза е поставена водоводна линија, има и нов резервоар којшто не ги решава само проблемите на оваа нова Турска социјална населба, туку го решава и проблемот со водоснабдување во горниот дел од градот кој се јавуваше во летниот период. Веќе сме подготвени за започнување на првиот дел од третата фаза, а тоа значи дека од страна на Секторот за урбанизам изготвени се проекти за куќите чиј вкупен број е 118, но сега се изготвени проекти за 26 куќи коишто согласно вториот повик распишан од страна на Владата, ние веќе го имаме аплицирано и се надеваме дека овој пат Владата ќе се издигне над дневнопартиските нивни интереси и конечно ќе даде поддршка за она што значи крупни капитални проекти за граѓаните на општина Струмица“ – кажа градоначалникот Костадинов.

Тој подвлече дека за овој проект се аплицирало за пари од Унгарскиот заем. Станува збор за 34 милиони денари со кои ќе се изградат првите 26 куќи. Инаку Општина Струмица од вториот повик на Владата, за пари од Унгарскиот заем треба да добие околу 428 милиони денари. Освен за куќите од Социјалната населба Општина Струмица аплицира со уште 12 други проекти.