Здружението за граѓанско општество и медиумска писменост „Медија Инфонет“ Струмица во наредните месеци ќе го имплементира проектот „Поврзи го Југоистокот за Европска иднина“. Истиот е финансиран од ЕУ во рамките на проектот „Медиумите за ЕУ“ кој во земјава го спроведува Евротинк во партнерство со Алда и Бирц. Како што соопштуваат од „Медија Инфонет“, целта на проектот е да се „приближи“ ЕУ до граѓаните од Југоистокот преку едукативни работилници и медиумски продукти поврзани со ИПАРД фондовите што ги има Европската унија за македонските земјоделци, но и за мали и средни претпријатија во Југоисточниот плански регион.
Проектот „Поврзи го Југоистокот за Европска иднина“ предвидува одржување на три едукативни работилници на тема ИПАРД фондови и тоа во Босилово, Радовиш и Богданци како дел од трите микрорегиони во Југоистокот на кои ќе бидат поканети граѓани, претставници на граѓански организации, земјоделци, фирми и претставници од општините од овој дел на државата. Следствено ќе има и медиумска кампања за значењето на ИПАРД фондовите за развој на македонското земјоделство и руалниот сектор при што ќе се презентираат позитивни примери од Југоистокот. Планирана е и Панел дускусија во Струмица на ова тема од која треба да произлезат и соодветни заклучоци како и препораки од граѓаните од Југоистокот за предизвиците поврзани со Европските ИПАРД средства.
Паралелно во проектот ќе бидат вклучени и медиумски работници кои со изработка на мултимедијални содржини ќе треба да ја доближат ИПАРД програмата на ЕУ до крајните корисници во Југоистокот. Со нивните продукти ќе се детектираат проблемите, пречките, предизвиците, бенефитите од европските средства за развој на македонскиот агро и руален сектор. На тој начин се очекува да се актуелизира и подигне на повисоко ниво прашањето за користење на овие фондови што ги доделува ЕУ.
Б.Терзиев
