Заев: Ако има еден од Турското маало да каже една работа што ВМРО-ДПМНЕ има направено тука и јас ќе гласам за ВМРО

Поранешниот лидер на СДСМ и претседател на Влада, Зоран Заев вечерва се обрати на митингот на СДСМ и коалицијата што се одржа во Турското маало во Струмица. Ова е негово прво обраќање на политички собир откако се повлече од политиката пред повеќе од две години.

Заев рече дека се обраќа со молба до граѓаните од овој дел на Струмица да го дадат својот глас за пратеничката листа на СДСМ и за кандидатот за претседател Стево Пендаровски, бидејќи соработката меѓу СДСМ и Турското маало трае 20 години и, како што кажа, е од Бога благословена.

„Секогаш сме имале почит кон противниците. Никогаш не сме ги делеле луѓето, дури и тие малку гласови што ги има ВМРО-ДПМНЕ, зашто кога имало потреба секогаш сме помагале, дали е за деца за училиште, за болни за било што не сме ги делеле луѓето затоа што солидарноста е темелна вредност на мултиетничкиот Социјалдемократски сојуз на Македонија. Ако има еден од Турското маало, еден од најмладиот до највозрасниот да каже една работа што ВМРО-ДПМНЕ има направено тука во Турското маало и јас ќе гласам за ВМРО“, кажа Заев.

Тој ги повика граѓаните на 8 мај да го дадат својот глас за пратеничката листа на СДСМ и за кандидатот за претседател, Стево Пендаровски, бидејќи, како што кажа, ниту една друга партија како СДСМ не ги обединува сите етнички заедници, култури и религии.

На митингот говореа и носителот и коносителката на листа на СДСМ и коалицијата во Четвртата изборна едница, Венко Филипче и Јована Тренчевска, кандидатот за пратеник Борче Цветков и градоначалникот на Струмица, Костадин Костадинов.