„Загина Гоце, Го убија Делчев“ – 121 година од убиството на Гоце Делчев

„Загина Гоце. Го убија Делчев. Остана жална Македонија без апостолот на македонското револуционерно движење. Оваа вест, како гром од ведро небо, се разнесе низ сите македонски краишта, до секој Македонец возљубен во својата родна грутка. Македонската земја ја наквасија солзите на нејзините чеда. Така беше на денешен ден пред 121 година. Македонија и македонските граѓани не паметат потраорен ден, од тој судбоносен 4 мај 1903 година. Воопшто не е мал списокот од револуционерни имиња и презимиња кои ја задолжиле татковината со своето дело, но се чини дека името на Гоце Делчев го заслужи самиот врв“ – кажа во своето обраќање градоначалникот на Струмица, Костадин Костадинов говорејќи за делото на Гоце Делчев по повод 121-та годишнина од неговото убиство.

Пред големиот споменик на великанот, на самиот плоштад во Струмица кој го носи неговото име, се одржа мала свеченост на која присуствуваа голем број граѓани, а најмногу имаше членови и функционери на политичките партии ангажирани во предизборната кампања. Свежо свеќе пред споменикот на Гоце положија градоначалникот Костадинов и членови на Советот на општината, политичките партии СДСМ, ВМРО-ДПМНЕ и ЗНАМ, од Сојузот на борците, директорката на ООУ „Гоце Делчев“ од Вељуса и навивачката група „Ајдуци“.

За апостолот на македонското револуционерно движење, Гоце Делчев членови од рецитаторската секција при Домот за деца и млади „Благој Мучето“ од Струмица, кажуваа стихови инспирирани од неговиот живот и делата.

ФОТОГАЛЕРИЈА