Завршува изградбата на новиот булевар „Братство Единство“, догодина ќе се гради и најавениот нов градски пазар

По изградбата на првиот булеварски мост „Обединување“, во Струмица завршува и изградбата на новиот булевар „Братство Единство“, информираше градоначалникот на општина Струмица, Костадин Костадинов кој денеска со неговите соработници и членови на Советот извршија увид во финалните работи, односно асфалтирањето на коловозните ленти.

„Станува збор за едно големо предизборно ветување пред граѓаните, секако со силни заложби, обврската на Општина Струмица беше да се изгради мостот, што всушност претставува и првиот булеварски мост изграден во Струмица. Мостот „Обединување“ е завршен, веќе се асфалтираат коловозните ленти на новиот булевар и очекуваме во најскоро можно време според планираната динамика, изведувачот да ги финишира работите. Овде би сакал да го афирмирам Секторот за локален економски развој и Софче Иванова за целата соработка, за целиот ангажман во соработката со Светска банка како кофинансиер во целиот овој проект. Како што може да видите, тука речиси и да нема парцела, очекувам и тие малку што ги има да се доизградат, локалната економија да заживее уште повеќе во овој дел од градот, во оваа индустриска зона и нормално во 2024 година очекувам зелено светло од советниците за отпочнување со реализација на новиот градски пазар, за што и примарно беше направен целиот овој булевар“ – кажа градоначалникот Костадинов.

Тој изјави дека Струмица, согласно анализите на многу економски експерти и последниот објавен прилог во медиум којшто третира прашања поврзани со економијата, Струмица е единствениот град во државата којшто не зависи од странски инвеститори.

„Тоа ни дава до знаење нам, како локална самоуправа, како градоначалник, Советот и целата општинска администрација, да бидеме што е можно повеќе фокусирани на локалната економија, на локалните компании кои што се доста ликвидни, затоа што знаеме, колку е голем предизвикот со работната сила и замислете една компанија којашто вработува 3.000 луѓе да дојде во Струмица, тоа значи ќе земе од друго место, не дека не се добредојдени, но сепак многу подраги и многу повеќе ги почитуваме домашните инвеститори, односно струмичките компании“ – додаде Костадинов.