Заврши карневалот во Струмица – карневалџиите го вратија клучот од градот

Претседателот на Организациониот одбор на Струмичкиот карневал, Александар Цицимов денеска на сам ден Тримери, пред трпезата со посни јадења, специфични за празнувањето на празникот, го врати „клучот од градот“, наместо на градоначалникот Костадинов, кој им го даде минатата среда, го даде на претседателот на Советот, Марјан Даскаловски, оти градоначалникот бил на службен пат.

„Дојде денот кога ќе ја губиме власта, кога треба да го вратиме клучот, меѓутоа тоа ќе го направиме горди, бидејќи она што го направивме сите заедно, сите граѓани на Струмица со поддршка на градоначалникот и Советот на општина Струмица можеме да бидеме горди. Од сите страни пристигнуваат честитки и благодарност за прекрасните карневалски денови во Струмица. Тоа ни дава можност да кажеме дека она што го ветивме пред осум дена во целост го исполнивме, иако знаевме дека така ќе биде, сепак е друго во едни такви услови, во едно невреме кое се чуствуваше, стегнати во срцата, но тие срца беа отворени, покажавме дека бевме добри домаќини, а нашите карневалџии покажаа дека се едни од најдобрите“ – кажа Цицимов.

Даскаловски упатувајќи пофални зборови и за организаторите на карневалот и за самите учесници во главното карневалско дефиле, кажа дека бил горд што во овие 7-8 дена организаторите направија Струмица да биде во центарот на светот.

„Јас не се сомневав дека карневалскиот одбор на чело со Цицимов беспрекорно ќе си ја завршат работата, тоа го докажаа и покажавме дека Струмица е европски град. Затоа му благодарам на карневалскиот одбор, ама власт е власт мора да си го вратиме клучот“ – кажа Даскаловски.