„Завод и Музеј“ од Струмица во Археолошкиот музеј во Скопје ја постави изложбата „Праисторија во Струмичко-радовишкиот регион“

„Завод и Музеј“ Струмица од денеска во Археолошкиот музеј во Скопје ја постави изложбата на артефакти кои припаѓале на праисториските заедници, кои живееле на територијата на Струмичко-радовишкиот регион, Орниче во село Костурино, Канли Чаир во село Дамјан, Страната и Чаушов Камен во село Ангелци, Бојковци и Тополничка Река село Дамјан, Голема Трпеза во село Старо Коњарево, Цареви Кули во Струмица, Чешмеџик во Радовиш, Манастир во село Габревци, Падарница во село Водоча, Штучка Река во село Штука и Скоруш Чешма во село Костурино.

Изложбата е насловена „Праисторија во Струмичко-радовишкиот регион (материјална и духовна култура на праисториските заедници)“, а се претставени дел од археолошки предмети кои потекнуваат од неолитот, енеолитот, бронзеното и железното време – крајот на седмиот милениум п.н.е. до средината на првиот милениум п.н.е.

Изложбата во Археолошкиот музеј во Скопје ќе биде отворена за посетители до 30 април.