Вечерва во организација на „Елеуса Фондација“ во хотелот „Вила Парк“ во Струмица се одржа Хуманитарен настан на кој беше претставена досегашната работа на фондацијата „Елеуса“, со цел да се поттикнат уште повеќе деловни субјекти, луѓе од бизнис секторот, општините и сите граѓани да се вклучат во нивната работа и да станат дел од ова хумано семејство.
На настанот до присутните се обрати Викарниот епископ стобиски г. Јаков – „Сострдалноста и милосрдието се нешта на што нѐ учи самиот Христос“ – кажа г. Јаков.
„Гладен бев, вие ме нахранивте, кога бев жеден, ме напоивте, кога бев патник, ме прибравте, кога бев без облека, ме облековте, кога бев болен, ме гледавте, кога бев в затвор, ме посетивте. Овие евангелски зборови на Христос на крајот ќе нѐ разликуваат од другите. Не колку долго стоиме во црква или колку се молиме, или колку метании правиме туку што чувствуваме во срцето кога ќе видиме некој што страда, што правиме за да помогнеме на беспомошните, гледајќи го секој човек како наш ближен, гледајќи го во него образот Божји“ – истакна Викарниот епископ г. Јаков.
На настанот беа промовирани и видео записи за досегашната работа на Фондација „Елеуса“.
„Исак Сирин вели: „Радувајте се со оние кои се радуваат и плачете со оние кои плачат“. Ние плачевме и со Џоко од Русиново, и со баба Достана и уште со бројни наши браќа и сестри на кои им е неопходна помош. Но, исто така се радувавме по секоја нивна добиена фотографија, радосни за помошта која ја добиле. Ние нема да застанеме тука. За два ипол месеци успеавме да поделиме 2.500 топли оброци, од почетокот до денес имаме испратено 750 хуманитарни пакети со храна и средства за хигиена. Помогнавме за реконструкција на две куќи, а испраќаме и еднократна помош. Истовремено организираме и различни едукативно-културни настани“ – кажа Наташа Василевска Трајчевска од „Елеуса Фондација“.
Од ова Фондацијата упатија голема благодарност до сите присутни, благодарност за донациите собрани ова вечер кои ќе послужат за подготовка на хуманитарните пакети по повод претстојните Божиќни празници.
