Земјоделците, но и малите и средни препријатија кои сакаат да го прошират својот бизнис, да ги следат сите огласи од ИПАРД програмата на ЕУ и соодветно да се информираат за можностите што ги нудат овие фондови. Ова беше пораката од првата едукативна работилница во Босилово што ја организираше Здружението „Медија Инфонет“ од Струмица во рамките на проектот „Поврзи го Југоистокот за Европска иднина“, финансиран од ЕУ преку Евротинк, Алда и Бирц од проектот „Медиумите за ЕУ“.
На присутните им се обрати консултантот Тихомир Петрески кој им ја објасни ИПАРД програмата на ЕУ. Конкретно се задржа на неколку точки во однос на тоа како може да се аплицира, за што конкретно, како тече постапката, кои трошоци се прифатливи односно сите можни чекори до Европските фондови за земјоделство и рурален развој. Тој подвлече дека програмата нуди огромни средства кои може да се слеат во македонскиот аграр и реален сектор, но се потребни издржани проекти кои даваат можност за одржливо производство.
Земјоделците и претставници од фирми кои беа присутни на првата работилница што се организираше во Едукативниот центар во Босилово, признаа дека многу малку стасуваат информации до нив за ИПАРД фондовите на ЕУ. Не знаат кога се повиците, ниту пак кај кого да се обратат и за што да аплицираат.
„Слушаме по медимите ИПАРД, но немаме доволно информации за оваа програма. Еве јас сакам да ја обновам механизацијата со кои ги обработувам нивите, но никој досега ми нема помогнато. Слушам само информации те овој добил, овој го одбиле. Јас не можам да работам на нива, а паралелно и да се занимавам со административни работи. Тоа државата треба да најде модел како да им помогне на земјоделците да направат одреден бизнис план и ние да аплицираме“, кажа Митко Андонов.
Петрески ги охрабри земјоделците и подвлече дека постојат консултатни кои стојат на располагање да ја тераат административната постапка. Според него целата процедура не е едноставна и лесна. Потребно е земјоделското стопанство однапред да ја планира инвестицијата и да ги обезбеди парите, а Ипардот може само да помогне да ја врати инвестицијата како помош на едно стопанство.
„Овие средства не се за почетен бизнис, туку за проширување и развој на одреден бизнис. Ако сакате да градите нов производствен капацитет, отворите нова линија, подигнете нови насади, треба однапред да ја планирате таа инвестиција за што треба да ги обезбедите и потребните средства, па да аплицирате од ИПАРД. ЕУ дава пари, но кога ќе забележи издржани проекти за одржливо производство“ – кажа Петрески.
Серијата работилници продолжува и наредните денови. Утре Здружението „Медија Инфонет“ ваква едукативна работилница ќе одржи во Радовиш во Центарот за уметност, каде ќе бидат презентирани начинот и условите како да се добијат европски пари за развој на бизнисите од агросекторот.
Проектот „Поврзи го Југоистокот за Европска иднина“ има за цел да ја „приближи“ ЕУ до граѓаните во Југоистокот со едукативни работилници и медиумски продукти поврзани со ИПАРД фондовите што ги има Европската унија. Тој е финансиран од ЕУ преку проектот „Медиумите за ЕУ“, што го спроведува Евротинк во соработка со Алда и Бирц.
