![almak](https://strumicanet.com/wp-content/uploads/2025/07/1080x206-srnet-optimized.png")
Евроамбасадорот Михалис Рокас денеска беше во посета на Струмица. Имаше средба со градоначалникот Костадин Костадинов, одржа и работен состанок со претседателот на Советот, Марјан Даскаловски и членови на Советот на општина Струмица, а во Europe House дебатираше со граѓани за важноста на евроинтегративниот процес.
Градоначалникот Костадинов ја нагласи посветеноста на општината и проактивниот пристап во спроведување на клучни проекти усогласени со европските стандарди.
„Факт е дека урбаната мобилност е една од фундаменталните вредности на европското креирање на политики, особено во делот на локалната самоуправа. Струмица токму тоа го прави. По пат на договор помеѓу општина Струмица и Делегацијата на ЕУ во Северна Македонија веќе инвестираме во смарт вело сити проектот каде што имаме веќе 8 километри реализирана велосипедска патека, а третата фаза е во тек на реализација и секако тоа треба да го продолжуваме, ама тука не завршува се. Ние мора да ги препознаеме таквите потреби и преку визионерски политики да продолжиме во однос на урбаната мобилност, за тоа и беше иницијативата за електрифицираниот јавен превоз со што станавме и прва општина на Балканот со целосно имплементиран јавен електрифициран превоз за кој што имаше дилеми и тоа е нормално“ – потенцираше Костадинов.
Посетата на општината амбасадорот Рокас ја искористи и за да се запознае со работата на Пречистителната станица за фекални и отпадни води кај Сачево. Овој објект, кој работи во рамките на ЈПКД „Комуналец“ од Струмица беше изграден со финансиска поддршка од 6,5 милиони евра од Европската Унија.
„Чистата вода е движечка сила, таа е носечки ресурс за луѓето и за природата, но е клучна и за економијата, односно за земјоделието. Струмица е регион каде што многу бизниси одгледуваат храна, која што освен на домашниот пазар, се извезува и во Европа. Проекти како оваа Пречистителна станица даваат значаен придонес за тоа што се произведува, да има соодветен квалитет. Европската Унија, меѓудругото, подготвува и стратегија за отпорност на водите. Политиките на ЕУ целат кон заштита на природата и биодиверзитетот, минимизирање на ризиците за човечкото здравје и транзиција кон циркуларна економија. Едноставно, иднината на секоја земја е тесно поврзана со одржувањето чиста животна средина“ – изјави Рокас.
Во Пречистителната станица пристигнуваат од 350 до 400м³ фекални и отпадни води од физичките и од правните лица во Струмица, а излегуваат од 280 до 300м³ чиста вода. Процесот на обработка се придржува до европските стандарди. Дополнително, Пречисителната станица е разубавена и со мурали од уметниците Ване Костуранов, Марјан Димиќ, Блаже Атанасов, Драган Китановски – Драш и Филип Конески.
Градоначалникот Костадинов и членови на Советот го прошетаа евроамбасадорот Рокас низ улиците на Струмица и направија едно возење во новите електрични автобуси низ централното градско подрачје.
