Од Противпожарната единица на Струмица информираат дека денеска интервенирале во гасење пожари на отворено на седум локации во струмичкиот регион, а биле запалени сува трева, стрништа и диви депонии.
Во атерите на селата Раборци, Просениково, Банско, Добрејци, Ангелци и Градско Балдовци. 25 пожарникари-спасители биле мобилизирани и седум противпожарни возила. Сите пожари биле предизвикани од човечки фактор.
Од ТППЕ Струмица апелираат до сите кои деновиве од најразлични причини ќе се движат на отворен простор да не палат огнови. Истото се однесува на земјоделците кои интензивно се подготвуваат за пролетната сеидба, кои ги чистат и палат отпадоците и стрништата на нивите, а огнот без контрола брзо се шири, особено кога времето е потопло и ветровито.
Потсетуваат дека предизвикувањето пожар, намерно или од човечко невнимание, претставува и кривично дело за кое се предвидени ригорозни законски санкции, парични и затворски казни до 10 години, зависно од крајните еколошки и други последици.
