До понеделник црвените домати ќе се откупуваат по 30 денари, а розовите по 35 денари за килограм – Постигнат договор со трговците

Во наредните неколку дена цената на доматот ќе биде фиксна. Дел од трговците од струмичко и дополнителниот заменик министер за земјоделство, Цветан Трипуновски постигнаа договор. До понеделник црвениот домат да се откупува по 30, а розовиот по 35 денари за килограм. Откупувачите дале ветување дека откупот ќе тече континуирано и договорот нема да биде само декларативно. Од Министерството најавија и засилени контроли на инспекторите на терен.

Трговците не ја исклучуваат можноста и за повисоки цени, но велат дека се ќе зависи од понудата на пазарот. Најголема конкуренција им биле албанските домати кои стасуваат порано и за пониска цена се пласираат на истите пазари во бившите југословенски републики.

Земјоделците го блокираа центарот на Струмица, бараат повисоки откупни цени на градинарското производство

Како резултат на ниските откупни цени на зеленчукот земјоделците од струмичко во последните десетина дена реализираа неколку протести со блокади на повеќе локални патни правци. Први незадоволството го изразија производителите на млад компир, по што им се приклучија и производителите на домати.