![almak](https://strumicanet.com/wp-content/uploads/2024/12/srnet-banner-dec-2-optimized.jpg")
Буџетот на општина Струмица за 2025 година тежи 1.522.390.450 денари или 24.750.000 евра. Со 12 гласа „за“, 9 „против“ и 1 „воздржан“, советниците во Советот на општина Струмица на денешната 46 седница го изгласаа новиот буџет по кој ќе се води општината во новата 2025 година.
Од вкупно планираните расходи во буџетот за 2025 година, 79% се тековно-оперативни, а 21% се капитални расходи кои го сочинуваат билансот на капитални расходи. Според структурата на тековните расходи, од вкупно 1.203.337.450 денари, дури 63% се однесуваат на расходи од блок дотации каде доминираат платите на вработените во образованието, детските градинки и културата, додека кај структурата на капиталните расходи од вкупно 319.053.000 денари, 89% се однесуваат на капитални расходи во основниот буџет, а 11% се донации од ИПА фондови.
„После консултациите со граѓаните на општина Струмица на одржаните Собири на граѓаните по Месни заедници во населените места и Урбаните заедници во градот, како и одржаните форумски сесии како главни активности на Буџетскиот форум за донесување на буџетот на општина Струмица за 2025 година, на кои учествуваа претставници од руралните и урбаните месни заедници и буџетските корисници, произлегоа многу предлози и писмени барања кои беа вградени во развојните програми и тие сега се составен дел на овој предлог буџет, заедно со буџетските програми од кои развојните програми ги претставуваат капиталните расходи за 2025 година“ – кажа градоначалникот Костадин Костадинов образложувајќи го буџетот пред советниците.
Опозицијата реагираше на предлог буџетот, вели дека овој буџет е крајно несериозен, ќе трпи многу ребаланси, не се однесува на реалните барања на граѓаните и буџетските корисници.
„Буџетот е правен само за да се има буџет, да се запазат законските рокови за негово донесување. Овој буџет е креиран за мегаломаски хирови на одредена владејачка структура, која за среќа е во заминување. Овој буџет не е граѓански и не е правен за граѓаните на Струмица и населените места. Во овој буџет, за да се покријат трошоците за најскапите автобуси ќе се прават уште ребаланси, а ќе се кратат средства од програми кои се особено важни за граѓаните“ – кажа Владимир Ристов, советник од редовите на ВМРО-ДПМНЕ. Тој тврди дека голем дел од програмите што треба да се реализираат 2025 година се намалени за 50 проценти, а некои 60 и повеќе проценти во споредба со 2024 година.
На седницата советниците од СДСМ и ВМРО-ДПМНЕ се расправаа и за тоа кој колку направил за Струмица во изминатите 30 години, едните за последните 20 години, а другите за претходните 11 години додека биле на власт.
Освен новиот буџет, советниците на денешната седница донесоа и Програма за работа на Советот на општина Струмица за 2025 година, го прифатија предлогот за субвенционирање на сметките за гас за домаќинствата на подрачјето на општина Струмица и за субвенционирање на надоместокот за приклучување на дистрибутивниот гасоводен систем и во новата 2025 година.
Беа усвоени повеќе програми и извештаи за работата на јавните претпријатија кои се под надлежност на општината, но и предлог програми во повеќе области, како што се културата, образованието, спорт и млади.
