Доколку беше жив Гоце Арнаудов денеска ќе полнеше 70 години

Ако беше жив, легендата на македонската песна Гоце Арнаудов денеска ќе го слaвеше својот 70-ти роденден. Гоце кој од мали нозе, па се до неговото прерано заминување од овој свет, пред 13 години, испиша многу успешни страници во музичката историја на Струмица и Македонија.

Ѕвездениот град Струмица имаше своја ѕвезда на земјата која стана ѕвезда на небото. Таа Струмица беше негов дом. Од тука заминуваше по другите градови и земји, низ сите светски меридијани, и повторно се враќаше на местото каде што си тежи каменот. Таа негова Струмица ја опеа и во песна, покажувајќи ја љубовта кон неа.

За легендата од Струмица, Општина Струмица пред 10 години, во предвечерието на неговиот роденден му подигна споменик кој го краси просторот во малиот градски парк, дело на македонскиот скулптор и сликар, професорот Митко Тошев.

„На Гоце Арнаудов не му е потребен споменик. Тој својот споменик го подигна со испеаните песни. Споменикот ни е потребен нам на струмичани, за да ни биде сведоштво за почитта која ја имаме кон човекот кој ја прославил Струмица надалеку, за да биде гордост на неговите современици и на генерациите кои доаѓаат по нас“ – кажа тогаш во своето обраќање поранешниот градоначалник на Струмица, Зоран Заев, откривајќи го споменикот со уметникот Тошев.

Неговите песни се пееја, се пејат и ќе се пејат, тој на секоја песна и даваше душа и ја пееше од душа и со неговата интерпретација беше и ќе остане незаменлив. Тој голем човек на македонскиот народ му го остави своето најголемо богатство, своите песни…