Доградбата на музичкото училиште „Боро Џони“ во Струмица во завршна фаза – објави министерот Јетон Шаќири

Општинското основно музичко училиште „Боро Џони“ во Струмица во септември новата учебна година ќе ја започне со дополнителни нови простории – кабинети по музика. На постојниот објект додаден е уште еден кат, покривот е адаптиран во училници. Инсталирана е нова водоводна и електрична мрежа, нови инвертер уреди, поставен е и лифт, пристапна рампа за учениците со посебни потреби, како и нова термо фасада на целиот објект. Ова денеска го најави на Фејсбук министерот за образование и наука, Јетон Шакири.

Станува збор за доградба на постојниот објект на музичкото училиште во Струмица, кое започна да се реализира во декември минатата година со пари обезбедени од Министерството за образование и наука во висина од 16.339.439 денари.

Министерот Шакири најави и дека паралелно со ова инвестиција МОН реализира уште три проекти во општина Струмица со Светска банка, во ООУ „Никола Вапцаров“, во ООУ „Маршал Тито“ и во ООУ „Герас Цунев“, каде се уредуваат санитарните јазли, се поставуваат пристапни рампи. Овие три проекти во овие училишта ќе чинат 5.456.115 денари.