![almak](https://strumicanet.com/wp-content/uploads/2024/12/srnet-banner-dec-2-optimized.jpg")
Директорот на Националната установа Завод за заштита на спомениците на културата и Музеј – Струмица, Бранко Ѓоргиев денеска на прес конференција ја презентираше Годишната програма на НУ „Завод и Музеј“ Струмица за 2025 година.
Годинава добиле повеќе пари за реализација од Министерството за култура и туризам, а најави и продолжување со реализација на значајни капитални проекти, како што се довршувањето на Стариот струмички театар, реконструкција на црквата „Св. Кирил и Методиј“ во Струмица и реализацијата на основен конзерваторки проект за санација на кровот на манастирот „Св. Леонтиј“ во Водоча, за кои од Министерството се одвоени дополнителни 212.200.000 денари.
Со 6.490.000 денари, НУ „Завод и Музеј“ од Струмица годинава ќе реализира над 35 проекти од музејската дејност, но и од областа на заштита на недвижното културно историско наследство.
Ќе има и заштитни археолошки истражувања на локалитетот Св. 40 севастиски маченици, кај Банско, заштитни археолошки истражувања на езерската наколна населба „Мрдаја“ во Дојран, како и два проекти за изработка на документација на културното наследство, еден проект за популаризација на културното наследство, еден меѓународен симпозиум, 5 публикации…
Ѓоргиев информираше дека во партнерство со музејот од град Кукуш, Грција аплицирале во ИНТЕРЕГ – програмата на Европската Унија за 2021-2027 година за изработка на кровна конструкција на античкото термално лекувалиште во Банско. Проектот бил одобрен и за негова реализација се издвоени 25.830.000 денари.
Од годинава новитет е и тоа што НУ „Завод и Музеј“ Струмица ќе располага со „делигиран буџет“. Тоа значи дека директорот и вработените сами ќе одлучуваат, во висина на одобрениот буџет од страна на Министерството за култура и туризам, за стратешкиот развој на институцијата преку самостојното утврдување на приоритетните проекти.
„Целта на оваа одлука е да се создадат услови за поефикасно планирање и реализација на програмските содржини од страна на директорот и вработените во установата“ – кажа Ѓоргиев.
