![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Синоќа во Струмица новата партијата на Максим Димитриевски, Движење ЗНАМ – За наша Македонија одржа Конвенција на која беше формирана Општинска организација, а за прв претседател е избран Миле Цеков, дипломиран економист, бизнисмен и актуелен претседател на Регионалната стопанска комора за југоисточниот регион.
„Како менаџер од приватниот сектор одлучив да влезам во борбата за коренити промени заедно со Движењето ЗНАМ – За наша Македонија со една и единствена цел, жестоко ќе се бориме против корупцијата, жестоко ќе се бориме против криминалот, жестоко ќе се бориме против нееднаквоста во општеството, недостатокот на правда, несредениот систем, катастрофалното образование, катастрофалното здравство, и сега најновото, најмодерното, сакаат да ни наметнат родител 1, 2, 3, 4, 5 и уште не знам колку. Не, ние сме традиционално општество и ќе негуваме традиционални вредности“, кажа Цеков потенцирајќи дека во овие 32 години од независноста на Македонија на политичката сцена се сé едни исти луѓе, со исти програми, едни исти партии, и се запраша, што ќе понудат во своите програми тие луѓе што не ги реализирале своите ветувања.
„Во овие 32 години сведоци сме како едни исти луѓе влегуваат во политиката со празни џебови, а излегуваат со милиони, се создаде еден впечаток дека полотиката е најпрофитабилниот бизнис. Е оваа пракса драги пријатели мора да ја промениме. Но ниту јас, ниту раководството од паријата, но и ниту претседателот Максим можеме сами да ги промениме овие пракси. Затоа Ве повикувам сите неопределени, сите независни, ајде да се обединиме, ајде да се охрабриме, да ги промениме овие практики“, кажа Цеков во своето обраќање пред голем број граѓани од Струмица и струмичкиот регион кои дојдоа да присуствуваат на оваа Конвенција на ЗНАМ.
Свое обраќање пред присутните имаше и претседателот на Движење ЗНАМ – За наша Македонија, актуелен градоначалник на Куманово, Максим Димитриевски информирајќи дека вакви општински организации на ЗНАМ до сега се формирани во 15 градови, а во Струмица ова е 16-та организација на која освен Миле Цеков за прв претседател избрани се и други органи и тела, како што се генерален секретар, Надзорен одбор и 11 членови на Извршен одбор, посекувајќи им успешна работа и поголема активност на претстојните Претседателски и Парламентарни избори.
„Јас една работа знам, дека, ние сме толку колку што сме, а не има многу, и такви какви што сме, а богами добри сме, и знаеме, умееме, можеме, и кога добро ќе се организираме и правилно распоредиме ќе дојдеме до конечната цел. Не само да ја корегираме оваа обнародена власт, туку првенствено да ја вратиме таму кадешто некогаш беше. Можеби е тешко од мој аспект да се говори вака, но верувајте ми многу време низ животот, а верувам и од вас присутните овде во оваа сала, исто така како мене трошиле многу време на улици, на протести, борба против режими, политичари, поединци, којшто се обнародиле на времето и ден денес се обнародуваат од народот, но за жал, секогаш сме ги тргале едните и доаѓале исти такви во друга форма“, кажа Димитриевски, додавајќи дека веруваше, а и до ден денес верува во концептот дека нема правда за сите во Македонија.
„Се боревме под слоганот „Нема правда, нема мир“, и доживеавме да дојде правда само за поединци коишто седнаа во топлите и удобни фотељи. Власта ја имаат во свои раце и верувајте ми аздисаа од власт. Се обнародија од власта, од ден на ден за нив е се поубаво, а народот ни пати. Нам народот во Македонија ни е несреќен, и ние имаме историска можност, но првенствено обврска, особено помладите генерации, да се обединиме и да ги смениме нештата“, додаде претседателот на ЗНАМ, Максим Димитриевски.
Од Движењето ЗНАМ најавија дека работат на отворање на што повеќе општински организации низ целата држава до одржувањето на Конгресот, планиран во почетокот на месец март на кој ќе бидат промовирани и нивните носители на кандидатските листи за пратеници за сите шест изборни единици за претстојните Парламентарни избори, како и нивниот кандидат за претседател на државата на следните Претседателски избори закажани за 24 април.
