Синоќа во Прилеп Движењето ЗНАМ – За наша Македонија го промовираше кандидатот за претседател на Македонија, Максим Димитриевски, како дел од Претседателскиот караван во 4-та изборна единица.
„Господинот Максим Димитриевски доаѓа со јасни цели со високо ниво на морал и желба да извојува победа заедно со граѓаните и работејќи за нив“ – кажа Миле Цеков од Регионалниот изборен штаб на ЗНАМ и претседател на ОО на оваа партија во Струмица.
„Со претседателскиот караван веќе две недели патуваме низ многу села и градови. Можам да ви кажам дека гледаме само црнила. Граѓаните се сиромашни и владее еден црно-сив свет. Во овие 30 години јас не знам едни исти луѓе што ќе понудат во своите програми и што ќе ветат по однос на владеење на правото, а си изгласаа закони каде нема да одговараат, си изгласаа покачување на нивните плати, а граѓаните се сиромашни како никогаш до сега“ – кажа Цеков на митингот во Прилеп.
Претседателскиот кандидат на ЗНАМ – За наша Македонија, Максим Димитриевски пред прилепчани порача дека околу нас народот е сѐ посиромашен и посиромашен, а политичката елита од ден за ден се побогата и побогата, а одговорно и јасно ќе преземе обврска на тоа тираниско владеење да му стави крај.
„Од Прилеп ја испраќаме пораката за обединување. На Македонија и е потребна нова опција која ќе ги обедини сите граѓани и ќе работи исклучиво за граѓаните. Таа опција е Движењето ЗНАМ – За наша Македонија. Затоа на следните избори СДСМ ќе изгуби, ВМРО-ДПМНЕ нема да победи, а Македонија ќе добие претседател што го обединува народот“ – кажа кандидатот за претседател Максим Димитриевски.
