„Независноста не е завршен чин, туку трајна обврска. Независноста секојдневно се гради преку почит кон законите, преку работата, чесноста, преку создавање услови за подобар живот за сите граѓани. Ние како генерација сме должни да ја чуваме и унапредуваме нашата татковина, да ја направиме место кадешто младите ќе остануваат, ќе учат, ќе работат и ќе создаваат семејства. Денес сме исправени пред нови предизвици, глобални економски кризи, миграции, потреба од одржлив развој, зачувување на животната средина, но со истата решителност со која во 1991 година рековме ДА за независна Македонија, денес мора да кажеме ДА за работа, за единство, за иднина“ – кажа во своето обраќање претседателот на Советот на општина Струмица, Марјан Даскаловски на денешната свеченост по повод 34 години од независниста на Република Македонија што се одржа пред големиот споменик на Гоце Делчев на плоштадот во Струмица, потсетувајќи дека 8-ми Септември не е само празник од календарот, тој е потсетник дека заедно можеме многу, дека со единство и љубов кон татковината се победуваат сите искушенија.
„Нашата различност е нашата сила, и сите заедно, без разлика на вера, етничка припадност или политичко убедување, сме граѓани на оваа држава и сите ја делиме истата обврска – да ја чуваме Македонија. Затоа денес да се поклониме пред делото на оние коишто го отворија патот до независноста, а истовремено да ја преземеме одговорноста за иднината. Да изградиме држава на правна сигурност и еднакви можности, тоа е најдобриот начин да ја изразиме љубовта кон Македонија“ – додаде Даскаловски.
На свеченоста, претставници на Советот на општина Струмица, на политичките партии, СДСМ, ВМРО-ДПМНЕ, ЗНАМ – За наша Македонија и Левица, на Сојузот на борците и нивни поддржувачи од Струмица положија свежо цвеќе пред споменикот на Гоце Делчев, а одбележувањето беше збогатено со рецитал за Денот на независноста во интерпретација на членови од Домот за деца и млади „Благој Мучето“ од Струмица.
