„Вечерва ја гледам оваа сала преполна со луѓе, преполна со енергија и надеж, и знам едно, победата е наша. Знам дека Струмица има сила, има срце и има визија. Енергијата што ја чувствуваме вечерва е доказ дека овој град знае што сака и знае кој може да го води напред“ – кажа во своето обраќање кандидатот за градоначалник на општина Струмица од СДСМ и коалицијата, Марјан Даскаловски кој потенцираше пред своите сограѓани дека „заедно го изградивме градот кој денес е симбол на култура, спорт, младост и економски развој, град кој пркосеше на најголемите душмани“.
„Денес, кога ќе кажете „Струмица“, секој помислува на град кој е пример за цела држава. И тоа не дојде случајно. Тоа е резултат на многу работа, визија и упорност. Горд сум што сум дел од таа приказна“ – додаде Даскаловски.
„Не сум човек кој гледа од страна или зборува од далеку. Сум бил со вас, во секоја населба, во секое маало, во секое село. Сум слушал проблеми, сум решавал предизвици, сум носел одлуки и секогаш со еден критериум: што е најдобро за Струмица. Мојата посветеност секогаш била на луѓето. Секогаш верував дека општината се гради со народот, со дела, а не со празни ветувања. Затоа и сите овие години, ги поминав помеѓу народот, со нивните проблеми, со нивните потреби, а кои беа мои предизвици. Така дојде и денот кога предизвикот стана уште поголем. Предизвик кој е чест, но и обврска, пред сите вас и пред сите наши сограѓани. Дојде денот кога, јас, Марјан Даскаловски, се обврзувам да бидам Ваш градоначалник. Градоначалник кој ќе биде со вас, до вас и ќе ги решава сите ваши проблеми. Градоначалник кој целосно ќе се посвети на општината, на граѓаните, на заедничките проблеми“ – кажа кандидатот за градоначалник Марјан Даскаловски.
Даскаловски обраќајки им се на струмичани во преполнетата сала во Центарот за култура во Струмица кажа дека од другата страна ќе слушаат многу празни ветувања, ќе слушаат дека ќе им дадат сè и сешто.
„Спремни со лажни анкети, притисоци врз секој граѓанин, притисок врз бизнис секторот, притисок од оние кои треба да нѐ штитат, тие ќе пробаат да не срушат, но не би биле ние тие кои сме, ако не им се спротиставиме и им ги срушиме мрачните сонови. Па затоа денес сме пред избор: дали ќе ја продолжиме успешната приказна или ќе дозволиме да ја скршат и да ја вратат назад“ – кажа Даскаловски.
Пред своите сограѓани се обрати и носителот на кандидатската листа за членови на Советот на општина Струмица, д-р Миле Гогов потенцирајќи дека ќе биде советник кој секогаш ќе биде меѓу луѓето, достапен, чесен и одговорен.
„Ќе бидам вашиот глас во Советот. Ќе бидам човек кој ќе носи одлуки со срце и со разум, секогаш имајќи ги предвид интересите на граѓаните“ – додаде д-р Гогов, повикувајќи ги граѓаните на општина Струмица на 19 октомври да ја покажат силата на Струмица, да потврдат истрајност и непокорност, заокружувајќи го бројот 5 на гласачкото ливче за градоначалник и за членови на Советот од СДСМ.
„Заедно со идниот градоначалник, другарот Марјан Даскаловски, имаме јасна визија за Струмица во следните четири години. Ќе работиме на грижа за најмалите со зголемување на капацитетите на сите градинки ширум општината, силна социјална поддршка за најранливите категории, затоа што хуманоста е мерило за едно општество, зелена и чиста Струмица, затоа што нашите деца заслужуваат да растат во здраво опкружување, младите да им дадеме поддршка, можности и верба дека нивниот сон може да се оствари тука, во нивниот град, села што живеат и просперираат, затоа што селата се коренот на нашата општина и тие мора да го имаат истиот квалитет на живот како градот“ – кажа д-р Миле Гогов, носител на листата со кандидати за членови на Советот на општина Струмица.
На синоќешната Конференција, на која беа промовирани кандидатот за градоначалник од СДСМ, Марјан Даскаловски и 23-цата членови на Советот на општина Струмица предводени од д-р Миле Гогов, меѓу струмичани беше и поранешниот градоначалник на Струмица, поранешен премиер на Македонија и лидер на СДСМ, Зоран Заев со сопругата Зорица кои му ја даваат целосната поддршка на својот другар Марјан Даскаловски да биде идниот градоначалник на општина Струмица.
