„Лицата со попреченост се најбројното малцинство. Според статистиката на Светската Здравствена организација, 15% од населението е со попреченост. Сепак, сé уште се недоволно застапени во демократските структури, парламентот, советите на општините и политичките партии. Голем број на значајни пречки негативно влијаат врз ангажманот на овие граѓани. Вклучувањето во политичкиот живот на лицата со попреченост треба да биде еден од главните приоритети на надлежните институции, локални самоуправи и на политичките партии – кажа Благица Димитровска од Здружението за промоција и развој на инклузивно општество ИНКЛУЗИВА на денешната Панел дискусија што се одржа во Струмица на тема „Политичко учество на лицата со попреченост“.
Танкица Митрева, член на Советот на општина Струмица од партијата СДСМ кажа дека нејзината партија на последните парламентарни избори излезе со листа за Изборната единица број 4, на која беше застапено и лице со попреченост од Струмица, односно лице кое се движи со помош на инвалидска количка. Малку недостасуваше тоа лице да стане пратеник во највисокиот законодавен дом во државата.
„Но, ако се симнеме на локално ниво, тогаш мора да се признае дека не постои лице со попреченост кое директно учествува во практицирањето на локалните политики, не само од партијата на власт, туку и од опозицијата. На пример, такво лице во Советот на општина Струмица нема. Но што значи тоа? Ако, поради ова, лицата со попреченост се оневозможени на директен начин, преку институционално одлучување да бидат дел од локалните политики, тоа не значи дека индиректно не се вклучени во креирањето на тие политики, особено кога се работи за остварување на нивните потреби, барања и интереси“ – кажа Митрева.
Здружението за промоција и развој на инклузивно општество ИНКЛУЗИВА, заедно со Институтот за човекови права подготвуваат иницијатива која ќе ја поднесат пред македонските институции со цел лицата со попреченост да бидат вклучени во процесите на одлучување во општеството.
Покрај претставници на здруженија на граѓани кои се борат за правата на лицата со попреченост на Панел дискусијата говореа и Спасе Додевски, координаторот за имплементација на Конвенцијата на ООН за правата на лицата со попреченост и Тони Милушев, раководител на Одделението за локален економски празвој при Општина Струмица.
Целта на овие Панел дискусии во организација на Здружението ИНКЛУЗИВА, а со поддршка на Општина Струмица е да се подигне свеста на локалните политички партии и претставници на Советите на општините, дека лицата со попреченост имаат еднакви права и можности за политичко учество.
