Градоначалникот на Струмица со претседателот на ЗЕЛС и министерот за земјоделство ги договорија насоките за решавање на проблемите на струмичани

Претседателот на ЗЕЛС, Орце Ѓорѓиевски денеска одржа средба со министерот за земјоделство, шумарство и водостопанство, Цветан Трипуновски и градоначалникот на општина Струмица, Костадин Костадинов, за решавање на проблемите на струмичани и изнаоѓање заеднички решенија. На состанокот се усвоија неколку заклучоци, а Ѓорѓиевски истакна дека ЗЕЛС е обединет и додека е тој претседател, сите проблеми ќе се решаваат на заедничка маса.

„Со добра волја и на заедничка маса, да дојдеме до заедничко и прифатливо решение за сите – беше нотирано денес на средбата во просториите на ЗЕЛС, која ја одржавме заедно со министерот Цветан Трипуновски и колегата Костадин Костадинов од Струмица. Со разговор секогаш се доаѓа до целта, па така и оваа плодна средба ќе вроди со плод, бидејќи веќе ги зацртавме правците на траекторијата за трајно решавање на проблемите на граѓаните од Струмица. Како што истакнав на моите претходни излагања, кај мене не постои поделба по ниту една основа и ќе бидам медијатор во решавање на сите процеси. Политика мора да стои настрана, граѓаните се приоритет“ – напиша на Фејсбук Ѓорѓиевски.

На средба, како што напиша Ѓорѓиевски, се договориле да се формира комисија од повеќе научни институции за следење на фактичка состојба на браната „Турија“ и причините за неодамнешното појавување на манган во водата.

Тој истакнува дека долгот што го има Општина Струмица спрема АД „Водостопанство“ ќе биде сервисиран согласно утврдена динамика и оти претпријатието ќе ги извршува сервисирањата и услугите од својата надлежност.

„Дискутиравме за квалитетот на водата која што во моментов според надлежните институции е исправна и чиста за пиење. Драго ми е и што колегата Костадинов го промени својот став и ЗЕЛС останува обединет“ – додаде Ѓорѓиевски.

„Позициите на Струмица исполнети“! – напиша на Фејсбук градоначалникот Костадинов.

„Деполитизација на предизвикот со водата во брана Турија! Работна експертска група која ќе даде дијагнозата и насоките, краткорочни, среднорочни и долгорочни за превенција на повторно појава на високо ниво на манган во водата. Динамика која ќе мора да ја почитуваме за сервисирање на долгот кон АД „Водостопанство“. Целосно превземање на обврските согласно надлежностите на АД „Водостопанство“, МЗШВ, “пштина Струмица. Затоа и беше активиран алармот, за да најдеме заедничко решение! Кога се сака, се може“ – напиша Костадинов.