Градоначалникот Костадинов и младите разговараа за формирањето на Локален Младински совет

Денеска млади од Струмица одржаа „тркалезна маса“ со градоначалникот на општина Струмица, Костадин Костадинов како дел од иницијативата „Општина по мерка на младите“, чија цел е зголемено младинско учество и формирање следни чекори за функционален Локален Младински совет на општина Струмица.

Градоначалникот Костадинов ги информираше младите за завршените процедури од страна на Општина Струмица за формирање Локален Младински совет, кои се во согласност со Законот за младинско учество и младински политики.

„Струмица работи во интерес на младите. Огромно беше задоволство да се биде активен учесник на денешната тркалезна маса „Поддршка на изборни реформи“, во рамките на проектот „Општина по мерка на младите“. Овој проект на Центарот за истражување и анализи „Новус“ опфаќа мониторинг на предизборното ветување за формирање Локален Младински совет на општина Струмица. Беше тоа прекрасна можност да ги споделам преземените чекори на општината. Покрај успешната реализација на неопходните процедури за формирање Локален Младински совет, во општинската зграда веќе неколку месеци трае адаптацијата на просторот наменет за негови активности“, кажа по средбата со младите градоначалникот Костадинов.

На тркалезната маса беа презентирани и активностите кои беа спроведени во текот на проектот, се дискутираше за процесот за формирање на Локален младински совет, неговата функција, а беа споделени препораки со цел општината да ги следи младинските трендови.