Годишната награда за животно дело на Горан Пандев за патрониот празник на Струмица

Фудбалската интернационална ѕвезда, поранешниот репрезентативец кој ја однесе Македонија на Европско првенство, струмичанецот Горан Пандев ја доби Годишната награда за животно дело на Општина Струмица по повод патронот на градот Светите Петнаесет Тивериополски свештеномаченици.

„Сигурно никој од нас немаше да стаса до тие височини ако не беа струмичани кои секогаш не поддржуваа, ако не беа нашите учители кои не учеа и ни го трасираа патот, ако не беа нашите тренери ментори кои не усовршуваа, ако не беа Светите Петнаеет Тиверополски свештеномаченици, кои беа нашиот чадор на верата, љубовта, здравјето, успехот. Овој празник, овој град не научи да се почитуваме, да се сакаме и да си помагаме. Така нека биде и во иднина оти само со верба, со подадена рака, со почит и љубов, со заедништво се рушаат планини и се постигнуваат успеси. Само кога сме сплотени може да поделиме насмевки, да шириме позитивна енергија да бидеме тоа, за кои своите животи ги дале Петнаесетте светители кои се нашите заштитници, но и нашиот патоказ за подобро утре“, кажа Горан Пандев во своето обраќање по добивањето на наградата, а кој во името на сите наградени и се заблагодари на Општина Струмица за доделувањето на годишните награди.

На свечената седница, Општина Струмица ги додели традиционалните Годишни награди „Свети Петнаесет Тивериополски свештеномаченици“ во повеќе области. На Фудбалскиот клуб „Тиверија“ за јубилејот 100 години од формирањето на клубот, на крводарителот Ѓорѓи Хаџи-Котаров за особен придонес во областа на крводарителството и хуманоста со над 50 пати дарување крв, на планинарот Благој Ѓузелов кој беше дел од македонската експедиција за искачување на Ајланд Пик на Хималаите, во областа на културата на м-р Зоран Рујак, археолог во НУ „Завод и Музеј“ Струмица, на Фондацијата „Елеуса“ од областа на социјалната заштита, на претседателката на Здружението на пензионери, Данче Даскаловска за особен придонес во областа на општествената работа и на Млекара „ЈОКА“, за особен придонес во областа на економијата и производството, која одбележа 30 години од основањето на компанијата.

На свеченоста по повод патрониот празник на градот Струмица свое обраќање имаше градоначалникот Костадин Костадинов, потенцирајќи ја улогата на заштитниците Светите Петнаесет Тивериополски свештеномаченици и традицијата во негувањето на нивните дела и љубовта кои ја имале кон Христа.

„Колку души брои градов, толку огледала ни се потребни. Колку не има возрасни, толку чистилишта ни се потребни, за да влеземе подготвени, чисти и орни за испишување нови поглавја за нашата Струмица. Време е да престанеме белото да го правиме црно, и обратно. Време е сејачите на ветрот да знаат дека жетвата е бура. Време е повторно да се возљубиме, пред да се изгубиме едни од други. Светите Петнаесет Тивериополски Свештеномаченици треба да ни бидат урнек, а Богочовекот Исус Христос да ни биде и пат, и мост, и сила, за заеднички да кажеме јасно и гласно „Нека патува, нека се движи напред, затоа што секое движење значи прогрес, прогрес за Струмица и нејзините граѓани“ – кажа во своето обраќање гардоначалникот Костадин Костадинов.

По повод празникот на градот, Општина Струмица на денешната свеченост му додели специјално признание на Вокално-инструменталниот состав „Распеани Струмичани“, кој работи во состав на НУ Центар за култура „Антон Панов“ Струмица, а признанието го прими директорката Белагија Аливкинова.

Свечената седница на Советот на општина Струмица беше збогатена и со „мал концерт“ на Детскиот хор „Бранко“ од Ниш, Србија, хор со 137-годишна традиција.

ФОТОГАЛЕРИЈА