Годинава 442 првачиња во општина Струмица тргнаа на училиште, општината очекува бројката да се зголеми

Денеска на првиот училишен ден од новата учебна 2023/2024 година во струмички основни училишта, 442 првачиња за прв пат седнаа во училишните клупи и го започнаа своето деветгодишно образование. Од Општина Струмица очекуваат ова бројка да се зголеми за уште 80 до 100 првачиња, бидејќи праксата од изминатите години покажува дека голем број првачиња, односно нивните родители од објективни причини не успеале да ги запишат во предвидените рокови.

Земајки ја годината на раѓање, 636 деца во прво одделение се планирани за ова учебна година, но голем дел од нив изминатите години се иселени со родителите во некоја од западно-европските земји. Одделението за образование ќе достави покани до родителите за упис на своето дете во прво одделение, тогаш ќе се знае дали семејството со планиран првооделенец е иселено надвор од територијата на општина Струмица.

Намалувањето на бројот на првачиња се забележува во градските училишта, а во некои населени места, како што се Попчево, Габрово, Раборци и Мемешли, нема ниту едно запишано прваче.

Општина Струмица и годинава доделува еднократна парична помош од 2.000 денари за семејства со прваче за прв пат запишано во учебната 2023/2024 година со постојано живеалиште на родителите на подрачјето на општина Струмица.

Во изминатите три години поради корона пандемијата го немаше традиционалното свечено одбележување за успешен почеток на првачињата пред Домот на АРМ, каде градоначалникот им посакува успешен старт во основното образование. Но и годинава ја немаше свеченоста, учителките си ги пречекаа првооделенците пред влезот на своите училишта, малку поголемите ученици им направија приредба и ги воведоа во училниците каде од понеделник ќе посетуваат настава.