Тортата насловена „Срце на дланка – Надеж“ направена од жени на Здружението „Мобилност“ од Гевгелија е најдобрата торта претставена на синоќешната 25-та Манифестација „Тортијада 2024“ што се одржа во хотелот „Вила Парк“ во Струмица. Жири комисијата составена од Николина Георгиева и Илинка Тодорова, едни од најискусните струмичанки во подготвување на слатки производи, втората награда и ја доделија на тортата подготвена од Здружението „Мобилност“ од Кочани, додека третата награда за тортата на Здружението „Мобилност“ од Велес.
Девет торти беа подготвени за синоќешната манифестација од домаќинки членови на здруженијата „Мобилност“ од Скопје, Куманово, Велес, Прилеп, Кочани, Штип, Радовиш, Гевгелија и домаќините Струмица.
Претседателот на Советот на општина Струмица, Марјан Даскаловски отворајќи ја манифестацијата кажа дека овој 25-годишен опстој е вреден за почит и внимание, а организаторите, Здружението „Мобилност“ од Струмица ја заслужуваат најголемата почит.
„Убеден сум дека по 25-ти пат оваа „Тортијада“ ќе го оправда својот „рејтинг“, стекнат во овој четвртина век, а сите учесници, без разлика од кој дел на Македонија доаѓаат, ќе докажат по којзнае кој пат дека инвалидноста воопшто не претставува пречка да се покаже инвентивноста, креативноста и мајсторството во правењето убави торти. Така било, така е, така и ќе остане и во иднина, но најважно е да се остваруваат главните цели на манифестацијата, а тоа се, успешното негување на културно-забавниот живот на лицата со телесен инвалидитет, како и подигнувањето на јавната свест кај граѓаните во врска со потребите на овие лица и нивна инклузивност во сите сегменти на општеството“ – кажа Даскаловски.
На манифестацијата „Тортијада 2024“ освен што беа презентирани торти направени од лица со телесен инвалидитет имаше и културно-забавна содржина. Настапи ансамблот „Фолклорна низа“, а за целосната забава се погрижија „Дуо Трио“.
Лицата со телесен инвалидитет потврдувајќи ги своите слаткарски вештини, преку оваа манифестација упатија заедничка порака дека и тие можат и умеат, како и останатите членови на заедницата.
Манифестацијата финансиски беше поддржана од Општина Струмица и Фондацијата „ЗАЕВ – Едно општество за сите“, како и спонзори од повеќе струмички компании.
