Вработените во „Паркиралишта Струмица“ си ја добија заостанатата плата

Вчера вработените во ЈП „Паркиралишта Струмица“ ја добија заостаната јулска плата, информираше денеска претседателот на Синдикалната организација при оваа општинско претпријатие, Фидан Методиев.

„Даде резултат најавениот штрајк на Синдикалната организација при ЈП Паркиралишта Струмица. Исплатена е заостанатата плата“- ни кажа Методиев, најавувајќи дека продолжуваат со синдикалните активности за поголеми работнички права и навремено исплаќање на платите.

„Синдикатот веќе подолг период има доставено колективен договор за потпишување до манаџментот на претпријатието, но за жал менаџментот нема слух за тоа“ – вели Методиев. Тие ќе инсистираат на потпишување на колективниот договор и зголемување на платите на сите варботени во претпријатието.

Вработените во „Паркиралишта Струмица“ стравуваат за своите плати – најавуваат штрајк

Платата на вработените доцнеше поради блокирањето на сметката на претпријатието од страна на фирми, кон кои не им се исплатени фактурите за завршени работни активности за Новогодишното украсување на градот, промената на канделабрите на Старата чаршија, како и реконстуркација на јавното осветлување на улицата „Сандо Масев“. Директорот на ЈП „Паркиралишта Струмица“ се правдаше дека тие пари требаше Општина Струмица да им ги исплати ним, а потоа тие на фирмите изведувачи. Но, до средата не беа исплатени, кога по реакцијата на синдикатот и најава за штрајк Општина Струмица префрли на сметката 15 милиони денари. Сметката беше одблокирана, а вработените ја примија платата на своите трансакциски сметки.