Вработените во Јавното претпријатие „Паркиралишта Струмица“ не добиле плата за месец јули, и стравуваат дали ќе можат да им се исплаќаат платите, бидејќи сметката е блокирана, информираше претседателот на Синдикалната организација при оваа јавно претпријатие, Фидан Методиев.
„Немаме земено плата поради долгови кон фирмите кои направија промена на канделабри на улицата „Маршал Тито“ – Стара чаршија и украсување на градот за Нова година, па затоа од нив сметката ни е блокирана“ – вели Методиев.
Директорот на ЈП „Паркиралишта Струмица“, Иван Стаменовски писмено ги информирал Синдикатот и вработените за оваа состојба, односно дека сметката на претпријатието е блокирана поради неисплатен долг кон добавувачите, бидејќи Општина Струмица, како нарачател на неколку проекти кои ги реализираше ЈП „Паркиралишта Струмица“, не им ги исплатил парите предвидени за реализација на проектите: Реконструкција на јавно осветлување на ул. „Маршал Тито“ (Стара чаршија), Реконструкција на јавно осветлување на ул. „Сандо Масев“ и надвозникот кај Општина Струмица, како и за Новогодишното украсување на градот.
„Очигледно е дека и покрај извршените и реализирани проекти не се исплатени средства кон ЈП „Паркиралишта Струмица“ од страна на Општина Струмица и истите средства да бидат исплатени кон надворешните изведувачи“ – стои во известувањето од директорот Стаменовски до вработените во претпријатието.
Стаменовски ги информирал и дека за ваквата состојба биле известени градоначалникот, претседателот на Советот и секретарот на Општина Струмица.
„Сите се известени дека со најголема итност и приоритет потребно е да се исплатат сите долгови за одблокирање на сметката на јавното претпријатие, како и, доколку деловникот за работа на Советот на општина Струмица го дозволува тоа, ваквата ситуација да биде на дневен ред на идната седница на Советот на општина Струмица“ – напишал Стаменовски.
Претседателот на синдикалната организација, Фидан Методиев информираше дека Синдикатот на СУТКОЗ при ЈП „Паркиралишта Струмица“, вчера одржал состанок со извршниот одбор на синдикатот и донеле одлука, доколку до петок, 22 август не се исплати заостанатата плата, синдикатот да започне подготовка за организирање штрајк.
