Доцна попладнето во „Јуроп Хаус“ во Струмица се одржа панел дискусија за предизвиците за спортот во Струмица поврзани со инфраструктура и финансии. Организатор на панелот беше Александар Илиев од Демократски институт за општествени и политички анализи Струмица. Панелисти беа Трајче Атанасов, претставник на шамионскиот Одбојкарски Клуб Струмица, Томе Христов, фудбалски тренер, Атанас Цикарски, кошаркарски тренер и професор по спорт, Митко Алачки, професор по спорт и Верица Целески, претставник на пинг-понг клуб Астраион.
Во дискусијата се вклучија и Марјан Даскаловски, претседател на Советот на општина Струмица и претседател на ОО на СДСМ Струмица, Владимир Ристов од ВМРО-ДПМНЕ и претседател на Комисија за спорт при Советот на општина Струмица и Миле Цеков, пратеник од ЗНАМ за Наша Македонија.
Панелистите истакнаа повеќе клучни предизвици за спортот во Струмица. Трајче Атанасов посочи дека Струмица не располага со доволно сали за спортови како одбојка и кошарка, дека салите во училиштата не се соодветни за одбојка, како и дека парите кои се добиваат од државата и општината за шампионскиот Одбојкарски клуб „Струмица“ се недоволни за финансирање на клуб кој игра и на меѓународна сцена. Истиот побара да се изнајдат фер и транспарентни начини за финансирање на клубовите како и да се промени начинот на менаџирање со спортските сали.
Томе Христов посочи дека фудбалските клубови работат на терени кои не се одржуваат соодветно, нема доволно простор на терените за тренинг со младите категории, недостасуваат соблекувални и други инфраструктурни услови. Во однос на финасиите Христов истакна дека е потребно и клубовите да размислуваат на самоодржливост и на помала зависност од финансиски средства од државата.
Верица Целески, објасни дека пинг-понгот како индивидуален спорт се соочува со предивици за финансирање како и недоволен простор за тренинг. Таа посочи дека за развој на индивидулани спортови во Струмица е потребно да се изгради мултифункционална спортска сала. Дополнително, истакна дека е предизвик за жените во спортот и тоа што нема соодветни соблекувални и простории за туширање за женските тимови.
Атанас Цикарски даде фокус на проблемите со училишните сали, но и објасни дека за да е можна едносменска работа на училиштата во Струмица, потребни се промени во програмата за образование со која ќе се овозможи дел од наставата и активности со спорт да се реализираат попладне. Дополнително, истакна дека парите кои ги добиваат клубовите од општината не се доволни ниту за изнајмување на термини во спортските сали.
Митко Алачки посочи дека училишниот спорт се соочува и со елементарни проблеми поради немање греење и ладење во училишните сали во Струмица.
На дискусијата се надоврзаа Костаке Колевски од ФК „Спартмани“ Балдовци, Марјан Даскаловски, Миле Цеков, Владимир Ристов, Харалампие Трајков, родител на двајца репрезентативци и поранешен фудбалер, Симон Џинес, одбојкарски судија, Кирил Манчев, доктор по медицина и Ленче Христова, претставник на Организација на жени од Струмица.
Костаке побара поддршка од политичарите за стадионот во Балдовци да биде повторно ставен во функција на спортот и да биде даден на користење на Академија „Пандев-Брера“. Тој покажа фотографии на кои се гледаше дека стадионот во Балдовци од уреден стадион со соблекувални станал пасиште за стока. На неговата дискусија реагираше Марјан Даскаловски кој вети дека ќе се заложи во најскоро време овој стадион да биде даден на користење согласно веќе доставеното барање од Академија „Пандев-Брера“ и согласност на граѓаните од Балдовци.
Миле Цеков истакна дека и тој самиот повеќе од 15 години тренирал фудбал и дека му е сосема јасно какви се условите за спорт во Струмица. Тој вети дека ќе се заложи за законски измени со кои ќе се издвојат повеќе финансиски средства за спорт, како и дека ќе се залага да се овозможат услови за едносменска работа на училиштата.
Владимир Ристов објасни дека е информиран за проблемите во секое училиште во Струмица и за причините поради кои дел од истите немаат греење во салите. Тој наведе дека е важно да се планираат средства за одржување на постоечките рекреативни игралишта, како и да се постави осветлување на дел од терените за фудбал со што ќе се овозможи тренинг и во попладневните и ноќни часови.
Симон Џинес ги дополни претходните дискутанти посочувајќи дека освен постоење сали важно е истите да се опремени со различна опрема потреба за модерен тренинг, како и да има теретани во склоп на спортските објекти. Тој и Харалампие Трајков имаа став дека клучно е менаџирањето на салите, а не само изградба на дополнителни сали.
Ленче Христова објасни дека женскиот спорт во Струмица се соочува со предизвици поради многу мали финансиски средства издвоени за истиот, кои се повеќекратно помали од оние за машките спортски екипи. Дополнтело таа истакна дека недостасуваат и соблекувални за жени и посебни простории за туширање за истите.
Повеќето учесници се согласија дека е потребно стопанисувањето со спортските објекти да биде водено од општината, а не истото да е во раце на приватни лица.
