Во тешка сообраќајна несреќа што се случила денеска околу 14 часот на експресниот пат Штип – Велес, во близина на крстосницата кон селото Иванковци, загина еден маж, а 18-годишно момче од Струмица е тешко повредено.
Според информациите од МВР, несреќата се случила при директен судир на две патнички возила. Увид на местото извршила екипа на СВР Штип, а биле повикани и пожарникари од Противпожарната единица Велес.
Д-р Елена Најдовска од Итната медицинска помош во Велес за МИА изјавила дека нивната екипа била повикана во 14:20 часот и пристигнала за десетина минути. Таа потврди дека кај еден од возачите, повозрасен маж, била констатирана смрт на самото место, додека 18-годишното момче од другото возило било повредено во пределот на карлицата, коленото и главата, но било свесно и контактибилно.
По укажаната прва помош, повреденото момче било пренесено во Ургентниот центар при Општата болница во Велес.
Автомотосојузот на Македонија соопшти дека сообраќајот на експресниот пат Штип – Велес е во прекин во двата правца додека трае увидот.
