Во струмичката болница за првпат е изведена процедура за стентирање на вратна артерија преку артерија на рака на пациентот

Во ЈЗУ Општа болница Струмица веќе пет месеци функционира Одделот за интервентна кардиологија со ангиографија на коронарни крвни садови и стентирање. Денеска за првпaт на Одделот за интервентна кардиологија е изведена процедура за стентирање на вратна артерија (каротидна артерија) преку артерија на рака на пациентот, информираат од ЈЗУ Општа болница Струмица.

„Станува збор за пациент кај кого е направена дијагностичка коронарографија каде е дадена индикација за хируршка реваскуларизација на срцето (бајпас) и третман на лева и десна каротидна артерија. Според протокол мораше да се обезбеди доволен проток на крв во мозокот, па потоа во втор акт пациентот да оди на бајпас операција. Кај пациентот преку десната рачна артерија (радијална), се пристапи до десната вратна артерија и се постави стент во истата. Пациентот во текот на утрешниот ден веќе би требало да биде пуштен дома“ – стои во соопштението на ЈЗУ Општа болница Струмица, упатувајќи јавна благодарност до д-р Сашко Николов, кардиолог од Штип и струмичкиот кардиолошки тим предводен од д-р Верица Милушева Трендова.