Утре (среда, 10 септември), во Домот на АРМ во Струмица со почеток во 12:00 часот ќе се одржи панел дискусија на тема „Европска иднина за Југоистокот – земјоделство и улогата на заедницата“. Станува збор за настан што се организира во рамките на проектот „Поврзи го Југоистокот за Европска иднина“ што го имплементира Здружението на граѓани „Медија Инфонет“ од Струмица.
Панел дискусијата има за цел да го поттикне јавниот дијалог, информираноста и вмрежувањето на медиумите, граѓанските организации, образованието и бизнис секторот за процесот на пристапување кон Европската Унија – со посебен фокус на Поглавје 11: Земјоделство и рурален развој.
На панелот ќе се дискутира за улогата на локалните заедници, медиумите и образованието за поразвиено земјоделство со посебен фокус на искористување на средства од домашни и европски фондови за развој, перспективите на Југоисточниот регион, но и практични предизвици и придобивки од ИПАРД програмата.
Свои обраќања ќе имаат, Стевче Јорданоски од Национална федерација на фармери на Македонија, Драги Памуков од Асоцијација на земјоделски задруги, Борче Јанев од Здрижението „Проагро Фармери“ од Струмица и Перо Николов од МЗШВ.
Проектот „Поврзи го Југоистокот за Европска иднина“ има за цел да ја „приближи“ ЕУ до граѓаните од Југоистокот преку едукативни работилници и медиумски продукти поврзани со ИПАРД фондовите што ги има Европската унија за македонските земјоделци, но и мали и средни претпријатија во Југоисточниот плански регион, финансиран од ЕУ во рамките на проектот „Медиумите за ЕУ“, кој во земјава го спроведува Евротинк во партнерство со Алда и Бирц.
