Во Струмица се славеше музиката од exYU републиките – концерт на „YU FOR YOU“

Песните од некогашните ЈУ простори живеат и кај нас во Македонија. Безвременските хитови на „Индекси“, „Бело Дугме“, „Парни Валјак“, „Галија“, „Леб и Сол“ се пееја синоќа во преполнетата сала во Центарот за култура на вториот концерт на „YU FOR YOU“.

Иван Кукиќ, Зоран Трендов, Иван Георгиев и Јан Стефановски се младите момчиња од кој е составен овој музички бенд, а функционираат веќе три години. Млади кои не ни живееле во поранешната заедничка држава Југославија, но ја негуваат, пејат и свират токму таа музика од тоа време и се се уште хитови кои ги слушат и новите генерации.

На „четворката“ придружни вокали им беа нивните другари Слободанка Иванов, Ване Панов, Стојан Иванов и Тодор Стефанов, но и публиката од различни генерации која ја знаеше секоја песна и пееше со актерите на сцената.

„YU FOR YOU“ за својот концерт имаа и специјални гости – музичари од Белград, Игор Винс на перкусии и Стефан Илиќ на виолина, а на сцената се појави и познатиот струмички гајдист Јане Крстев, кој ја засвири, а ја пееја сите „Липе цвату, све ја исто ко и лани“ од „Бело Дугме“.

Вистинско изненадување за сите беше појавувањето на сцената на виртуозот на гитара, легендарниот Влатко Стефановски, кој заедно со „YU FOR YOU“ ја засвиреа и пееја познатата македонска „Учи ме мајко карај ме“, а на сцената се појавија и семејството Кукиќ кои крајот на концертот го заокружија со фамилијарна поддршка во пеењето со младиот Иван Кукиќ.

Премиерно на концертот Иван Кукиќ ја промовираше и својата прва песна, откако склучи договор со познатата хрватска продуцентска куќа „Croatia Records“, а насловена „Балада за една љубов“. Веќе денеска ќе се најде на YouTube каналот на „Croatia Records“. Музиката ја напиша Иван, текстот е на Стефан Илиќ, а аранжманот е заеднички.

Двочасовниот концерт „Ден на Републиката“ беше вистинска музичка убавина, потсетување на добрата музика од златниот период на југословенското музичко творештво, која се слушаше некогаш, но и се уште се слуша и живее во музичките настапи на многу млади музичари.

На синоќешниот концерт меѓу публиката беа и струмичкиот градоначалник Костадин Костадинов, поранешниот премиер Зоран Заев и поранешниот министер за здравство Венко Филипче, кои ги потпевнуваа безвременските хитови на „Индекси“, „Бело Дугме“, „Парни Валјак“, „Галија“, „Леб и Сол“…

ФОТОГАЛЕРИЈА