Во Струмица се одржа работилница „Соработката на локалната самоуправа со Народниот правобранител и придобивките од децентрализација за граѓаните“

Во организација на Канцеларијата на Народниот правобранител, а во рамките на ИПА проектот „Владеење на правото“, денеска во Домот на АРМ во Струмица се одржа работилницата на тема „Соработката на локалната самоуправа со Народниот правобранител и придобивките од децентрализација за граѓаните“.

На работилницата учествуваа претставници од општинските одделенија, јавните претпријатија и граѓанскиот сектор, а се говореше за пренесените надлежности на локално ниво, како и за нивното влијание врз правата на граѓаните во делот на урбанизмот, животната средина, образованието, работните односи и социјалната заштита.

Народниот правобраниел Насер Зибери, во својот поздравен говор ја истакна важноста на соработката на релација Народен правобранител – локална власт, притоа потенцирајќи дека со процесот на децентрализација општините добија ингеренции да одлучуваат за низа работи со кои треба да им се подобри квалитетот на услугите на граѓаните.

„Соработката на релација Народен правобранител – локална власт игра голема улога, пред сѐ во остварувањето на ефикасна заштита на правата на граѓаните. Таа е од големо значење, затоа што токму голем број на ингеренции кои значат создавање на претпоставки за хуман живот – уредување на просторот, живот во чиста животна средина, управување со отпадот, потоа процесот на образованието, како значајна алка во развојот и едукацијата на децата и младите и низа други работи кои се во надлежност на локалните власти“, истакна Народниот правобранител Зибери.

Говорејќи за ефектите од децентрализацијата и соработката со Народниот правобранител, градоначалникот Костадинов истакна дека Струмица е вистински пример за извонредна соработка помеѓу Општината и Народниот правобранител.

„Но поаѓајќи од фактот дека секогаш може повеќе и секогаш може подобро, јас сум безрезервно подготвен таа соработка не само да ја негуваме, туку постојано да ја унапредуваме. Народниот правобранител не смееме да го гледаме како спротивставена страна, туку напротив, како добар партнер во борбата за остварување на човековите слободи и права, а тие слободи и права се неприкосновени. Едно е повеќе од сигурно, ваквите работилници, состаноци и меѓусебни средби се неопходни за унапредување на заштитата на правата на граѓаните, затоа што ние постоиме за доброто на граѓаните“, кажа градоначалникот Костадинов.