Во Струмица се одржа Меморијален турнир во кошарка за ветерани во чест на Звонимир Кечев

Денеска во Спортската сала „Парк“ во Струмица се одржа првиот меѓународен Меморијален турнир во чест на некогашниот кошаркар, прерано починатиот Звонимир Кечев – Кечето, а го организираше кошаркаркиот клуб „Ветерани Баскет“ од Струмица.

На првиот Меморијален турнир учествуваа ветераните на КК Лесковац – Србија, КК Солун – Грција, КК Варна – Бугарија, кошаркарските клубови на ветерани од Кавадарци, Велес, Битола и домаќините КК Ветерани Баскет од Струмица.

„Звонко беше вистински лидер на теренот, но уште поважно, беше човек на кој сите можевме да се потпреме, секогаш спремен да подаде рака и да помогне. Неговата посветеност во кошарката и љубовта којашто ја имаше кон овој спорт ќе остане засекогаш запаметена. Овој турнир не е само за натпреварување – тој е симбол на неговото наследство и одраз на се што тој претставуваше за нас. Со натпреварите што ќе ги видиме денеска го чуствуваме духот на играта што Звонко ја носеше во себе, а со тоа го продолжуваме неговиот пример. Нека овој ден биде потсетник на сите нас колку е важно да го негуваме тимскиот дух и пријателствата кое ги гради спортот“ – кажа во обраќањето Павле Узунов од КК „Ветерани Баскет“ Струмица.

Инаку, Звонимир Кечев – Кечето, беше член на струмичките кошаркарски великани КК „Неметали Огражден“ и КК „Македонија ‘91“.

ФОТОГАЛЕРИЈА