Преку „Зелено за добро“ до почист воздух и зелена инфраструктура во регионот
Во хотелот „Сириус“ во Струмица денеска се одржа прес-конференција на која беше најавено отпочнувањето на проектот „Зелено за добро“, чија цел е намалување на загадувањето и подобрување на квалитетот на воздухот преку примена на чиста енергија и одржливи решенија.
Настанот го организираше Центарот за развој на Југоисточниот плански регион, а проектот се реализира со поддршка на Европската Унија и националните фондови на земјите учеснички, во рамки на Интеррег ИПА Програмата за прекугранична соработка „Грција – Северна Македонија 2021-2027“.
На настанот се обрати и министерот за локална самоуправа, Златко Перински, кој истакна дека ваквите иницијативи се особено значајни во контекст на актуелните еколошки предизвици.
„Особено ми е драго што повторно за релативно краток период зборуваме за проект кој директно придонесува за заштита на животната средина — тема што е од исклучителна важност, особено во зимските месеци кога предизвиците со квалитетот на воздухот се најизразени“, истакна министерот Перински.
Градоначалникот на општина Струмица, Петар Јанков, нагласи дека локалната самоуправа континуирано ги поддржува проектите кои придонесуваат за подобрување на животната средина и развој на одржливи урбани решенија.
„Струмица отсекогаш поддржува вакви проекти, за одржување на животната средина, за намалување на загадувањето, одржување на зелени урбани средини, подобрена мобилност на граѓаните кои користат превоз кој не емитува штетни гасови. Со тоа што е прекуграничен проект, се потврдува дека екологијата не познава граници и сите заедно треба да наоѓаме идни можни решенија. Посакувам успешна реализација на проектот од кој бенефит ќе имаат граѓаните во целиот регион“, изјави градоначалникот Јанков.
Проектот ќе се реализира до август 2027 година и има вкупен буџет од 1.345.057 евра, од кои 420.442,84 евра се наменети за Центарот за развој на Југоисточниот плански регион.
Во имплементацијата учествуваат повеќе партнери од Северна Македонија и Грција, меѓу кои Центарот за развој на Југоисточниот плански регион, Меѓународна соработка Југ-Југ – подружница Скопје, Центарот за истражување и технологија од Грција и Општина Терми.
Во рамки на проектот се предвидени повеќе активности насочени кон зелена инфраструктура и енергетска ефикасност. Меѓу нив е поставување на осум станици за брзо полнење електрични возила во прекуграничниот регион, од кои шест ќе бидат во Југоисточниот регион на Северна Македонија – во Струмица, Радовиш, Ново Село, Валандово, Дојран и Гевгелија, а по една во Солун и Терми во Грција.
Дополнително, ќе бидат инсталирани четири фотоволтаични системи во општините Гевгелија, Радовиш, Босилово и Конче, ќе се реализираат пилот-урбани градини во Радовиш и Терми, како и Центар за зелено образование во Гевгелија и зелена лабораторија во Солун.
Проектот предвидува и организација на најмалку шест прекугранични настани посветени на обновливата енергија, како и формирање комитет за прекугранично управување со цел обезбедување долгорочна соработка и одржливост на активностите.
Од проектот се очекува придобивки да имаат граѓаните, локалните власти, образовните институции, граѓанските организации и бизнис секторот, преку развој на зелена инфраструктура, подигање на свеста за одржлив развој и создавање нови можности поврзани со обновливи извори на енергија и е-мобилност.
ФОТОГАЛЕРИЈА
