![almak](https://strumicanet.com/wp-content/uploads/2024/11/srnet-banner-noe-2-optimized.png")
На површина од 43.000 м², спроти „Агрокор“ во Струмица почна да се гради нов современ Градски пазар. Ќе го гради фирмата „Џови Компани“ од Мокрино за сума од 272.535.890 денари, односно 4,4 милиони евра. Таа треба новиот Градски пазар комплетно да го направи за 2 години, а Општина Струмица договорената сума треба да му ја исплаќа во период од 5 години. Планирано е еден дел од пазарот, односно 8.200 м² да бидат покриени, останатото е отворен дел. Ќе има вкупно 527 тезги, а планирани се и 250 паркинг места за возила.
„Знаеме дека Струмица и струмичко се земјоделски регион, како примарна гранка ни е земјоделието и знаеме колку е важно и за земјоделците, но и за останатите граѓани да добиеме нов современ градски пазар“ – кажа градоначалникот на општина Струмица, Костадин Костадинов на денешното поставување камен темелник и отпочнувањето на градежните активности на овој Градски пазар.
Освен градоначалникот Костадинов, лопата со малтер во камен темелникот фрлија и лидерот на СДСМ, Венко Филипче кој присуствуваше на оваа мала свеченост, директорот на ЈПКД „Комуналец“, Љупче Љачев и Бончо Божинов, земјоделец од Дабиле.
На овој чин немаше осветување на камен темелникот и благослов од свештеник за почеток на градбата, како еден традиционален христијански обред при отпочнување на нова градба.
По реализацијата на изградбата за 2 години, пазарот „Чешел“ ќе се дислоцира, а на негово место ќе се гради „Боемски парк“.
