![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Во Центарот за култура „Антон Панов“ во Струмица синоќа се одржа настанот „Љубов за сите“ во чест и спомен на големата македонска уметница Андријана Мациев, која прерано замина во Вечноста, но остави дела по кои ќе се памети засекогаш.
Поставени се 20 нејзини дела од 3 ликовни циклуси: „Живот во бои“, „Женски приказни“ и „Шарени вибрации – Разбуди се, погледни во сонцето и насмевни се“. Беа промовирани двата алманаха, со наслов „Љубов за сите“, пишувани од група автори, инспирирани и вдахновени од земниот и небесниот живот на Андријана Мациев, олицетворение на Ангел Небесен.
Овој настан се одржа на 44 нејзин роденден, кој ќе го славеше ако беше жива, а која замина од овој свет на 12 мај 2022 година по двегодишна борба со „најтешката“ болест – ракот.
Ликот и делата на Андријана Мациев се инспиративни и чудесно живи и денес, а за неа и нејзините дела говореа Ѓорги Калајџиев и најзината мајка Јулија Мациевска, која своето дество го помина во Струмица.
Андријана Мациев беше член на Друштвото на ликовни уметници на Македонија и во здружението „Широка стаза“ од Земун. Изложуваше самостојно од 2009 година реализирајќи 25 изложби во Скопје, Прилеп, Кавадарци, Гевгелија, Кочани, Демир Капија, Струмица, Куманово, Неготино, Радовиш, Крива Паланка, Белград, Софија и Сарасота. Учествувала на повеќе од сто групни изложби од 2006 година, манифестации, ликовни колонии и работилници во Македонија и Инстамбул, Варна, Шамелиер, Белград, Тузла, Созопол. Реализира и ликовни перформанси во склоп на културните денови во Македонија.
Мациев е добитничка на повеќе награди меѓу кои: прва награда од Фондацијата „Драгутин Аврамовски-Гуте“ (2008), Награда за посебен придонес во уметноста на графиката, Chamalieres, 8 Mondial de l Estampe et de la Gravure Orginale Triennale de Chamalieres (2010), Признание „Уметник на годината“ од Меѓународна манифестација за литература, уметност и култура „Планетопија” (2019), Платинеста плакета за целокупното ликовно творештво на Интернационална литературна манифестација и манифестации за ликовна култура „Милица Паулус“ (2021).
