Во Струмица одбележан првиот Ден на хип-хоп културата по повод јубилејните 50 години хип-хоп творештво

7 Октомври – локалниот Ден на хип-хоп културата беше одбележан во саботата во Амфитеатарот во Струмица. Темата на првото одбележување на овој ден беше 50-годишниот јубилеј на хип-хоп творештвото, кое го опфати секој дел од светот.

На настанот беше промовирана целата дискографија на струмичката рап група Дивизија, 5 проекти на 4 аудио касети. Свој настап имаа One Way Dance Studio, танцово студио од Струмица кое ја негува хип-хоп културата, како и Даре ДТ и Миро Грчев од рап колективот Соулментал, а во рамките на сегментот „отворен микрофон“ им се придружија Кискин, Киндер, Жиле, Тоти-Е, Јордан, Дако, Паки, Марко Ортографија и Геле-К.

Како дел од настанот, Пандамониум Радио, македонски подкаст посветен на хип-хопот, имаше епизода директно од струмичкиот амфитеатар. Водители на овој подкаст кој влегува во четвртата сезона се Дарко Андонов – Ајри Скреч и Трајче Митев.

„Историски, Струмица има многу оставено на македонската сцена како печат и не само како творештво, туку и како место каде што живееле луѓе кои се интересирале за оваа култура и оваа музика, и може да се каже дека Струмица заслужува да има еден ваков ден, посебно после сѐ што имаат направено сите екипи од тука, пред сѐ, се разбира, луѓето кои ни се домаќини“, рече Ајри Скреч.

Во подкастот гостин беше домаќинот, рап артистот Драги Андонов – Кискин. Веќе една година тој соработува со диџеј СТР, кого го смета за свој сроден битмејкер. „Секој бит што ни го има пратено ни е направен веќе песна“, се пофали Кискин и најави дека следната година ќе излезе нов албум на Дивизија целосно продуциран од диџеј СТР. Во разговорот се приклучи и Роберт, чие уметничко име е Скептик, еден од првите струмичани кои твореле рап, и Геле-К, кои зборуваа за историјата на рапот во нашиот град, како и Даре ДТ.

Инаку, Денот на хип-хоп културата во Струмица минатата година беше прогласен од градоначалникот на општината, Костадин Костадинов, на иницијатива на Драги Андонов – Кискин.

ФОТО: Лупе Боги