По повод 23-ти Октомври, Денот на македонската револуционерна борба и 132 години од основањето на Македонска Револуционерна Организација во Солун во 1893 година, денеска во организација на Општина Струмица, во Домот на АРМ се одржа свеченост на која за историјата на празникот говореше новоизбраниот градоначалник на општина Струмица, Петар Јанков од ВМРО-ДПМНЕ кој на изборите во недела го доби мандатот за градоначалник од огромното мнозинство граѓани.
Тој говорејќи за празникот 23 Октомври, кажа дека ова е датумот кога е вкоренета идејата за конечно ослободување на Македонија и зачувување на националниот идентитет. И дека формирањето на Македонска Револуционерна Организација во далечната 1893 година бил сложен и тежок процес во борба против османлиската власт во Македонија, потецирајќи дека и покрај сите интелектуалци, дејци и чеда на Македонија свој придонес дале и наши струмичани, личности кои овде во струмичкиот регион создале една база за итно ослободување на Македонија, меѓу кои се и Ристоман Попчевски, Атанас Нивичански, Стојан Ѓоргиев, Ана Христоманова, Новоселски, Ајдински, чиј пример во втората светска војна го следеле и струмичките партизани.
Новоизбраниот градоначалник на Струмица, Петар Јанков, кој веќе од понеделник би требало официјално да ја презема градоначалничката функција, во своето обраќање кажа дека како човек кој ја наследува локалната власт во Струмица, борбата за Македонија и денес ќе ја продолжи.
„Дури и на локално ниво, ние ја преземаме битката на претходните генерации за да ја направиме Струмица, а со тоа и Македонија достоинствена, слободна и просперитетна. Да ја ослободиме нашата татковина од криминалци, од предавства, од долгови. Да ја ослободиме од луѓето кои прават неправда на нашата држава и нашиот народ“ – кажа Јанков.
Свеченоста беше збогатена со културно-уметничка програма. Со свои рецитали настапија членови на Домот за деца и млади „Благој Мучето“, музички точки изведоа ученици од основното музичко училиште „Боро Џони“, а играорците на ансамблот „Фолклорна низа“ ја претставија македонската традиција преку неколку кореографии на македонски ора.
