Во Струмица одбележан Денот на згрижувачите во Македонија

Денеска во Подрачното одделение на Центарот за поддршка на згрижувачки семејства на СОС Детско село во Струмица се одржа настан по повод 1 јуни – Денот на згрижувачите во Македонија.

Ова Подрачно одделение е дело на Центарот за згрижување и згрижувачки семејства СОС Детско село и Општина Струмица која даде несебична помош и поддршка за сето тоа да функционира како што треба, за доброто на дечињата. За влогот на Општина Струмица во ова одделение, пред присутните зборуваше Тони Милушев, раководител на Одделението за ЛЕР при Општина Струмица.

„Општина Струмица минатата година ги отстапи овие простории во Повеќенаменскиот социјален центар без надоместок, а без надоместок се и другите услови за да може ова одделение да си ја врши својата дејност, односно да го афирмира процесот на згрижување деца без родители, но и за да пружи помош на оние семејства кои згрижиле деца. Препознавајќи ја потребата од ваквата услуга и големата заложба кога станува збор за згрижувачките семејства од страна на Општина Струмица, уште еднаш ја докажавме несебичната поддршка за давање поддршка на згрижувачки семејства. Во 2025 година покрај досегашната финансиска поддршка за ослободување од плаќање надомест за деца на самохрани родители за престој во детска градинка, ги опфативме и децата згрижени во згрижувачки семејства. Нашата поддршка за згрижувачките семејства ќе ја продолжиме и надградуваме, затоа што секое дете заслужува да расте во семејство и да биде среќно“, кажа Милушев.