![almak](https://strumicanet.com/wp-content/uploads/2024/11/srnet-banner-noe-2-optimized.png")
Македонија денеска го чествува 23 Октомври – Денот на македонската револуционерна борба и 131-та година од основањето на Македонска Револуционерна Организација во Солун во 1893 година, како симбол на стремежите за сувереност и државност, но и храброста и истрајноста на македонските револуционери во борбата за слобода, сувереност, независност и македонска државност.
Денеска во Домот на АРМ во Струмица се одржа свеченост на која за историографијата на празникот говореше пратеникот во македонското Собрание, Жан Дрвошанов.
„Овој ден се одбележува како потсетник на храброста и посветеноста на многу генерации борци кои се бореле за слобода и независност. Чествувањето на 23 октомври, ден на формирањето на ВМРО, не само што нè повикува да го почитуваме наследството, туку и да размислиме за значењето на слободата и правата на секој народ“ – кажа Дрвошанов.
Во своето обраќање пратеникот од ВМРО-ДПМНЕ, Дрвошанов кажа дека борбата за Македонија и денеска продолжува, и дека тие ја преземале битката на претходните генерации за да ја направат Македонија достоинствена, слободна и просперитетна.
„Да ја ослободиме нашата татковина од криминалци и од предавства, од долгови, да ја ослободиме од луѓето кои прават неправда на нашата држава и нашиот народ. Да ја ослободиме Македонија од несигурност за иднината на младите. Да ги ослободиме политичките затвореници на современа Македонија и да ги признаеме нејзините маченици“ – додаде Дрвошанов.
На свеченоста што ја организираше Општина Струмица со свој рецитал се претставија членови на Домот за деца и млади „Благој Мучето“ од Струмица, настап со традиционална македонска музика имаа млади музичари од ОМУ „Боро Џони“ од Струмица, а играорците на Ансамблот „Фолклорна низа“ заиграа македонски ора.
